Идораи барномаҳои ҷавонӣ, зебоӣ ва варзиш талқингари ҳаёти солим миёни ҷавонони кишвар, муаррифгари ҷавонони муваффақ дар хама соҳаҳо ва бозгӯи вазъи варзишии кишвар мебошад. Ҳайъати эҷодию техникии идора комилан ҷавонон мебошанд, ки пайи таҳияи барномаҳои ҷолибу диданианд.
Журналистон Мадина Бобоева, Моҳлиқо Шарифова, Дурахшони Ортиқ, Лутфияи Абдулазиз, Таҳмина Худойқулова, Меҳроб Исроилов ва дигар навкорону коромӯзон дар якчоягӣ бо коргардон Музаффар Раҳматов барномаҳои «Субҳи якшанбе», «Хонадон», «Муошират», «Этикет», «Иқтисод», «Қатрае аз баҳр», «Аржанг», «Ҷилваи ҳунар», «Сафдар», «Созу роз», «Далерон», «Кашшоф»-ро таҳия месозанд.
Танзиму ороиш ва банду басти барномаҳои идораро Маъруфҷони Ҳусейнзод, Абдухалил Буриев ва Абдураҳим Шукуров анҷом медиҳанд.
Барномаҳои ҷадиди телевизионӣ, ки таҳияи онҳо аз ҷониби кормандони идораи барномаҳои ҷавонӣ, зебоӣ ва варзиш дар ин сол дар нақша аст «Бозёфт», «Ҳафт ахтар», «Ангеза», «Дурахшандагон» ва «Роҳнамо» мебошанд.
Вазифаи самуҳаррири идораи барномаҳои ҷавонӣ, зебоӣ ва варзишро айни ҳол Моҳлико Шарифова бар ӯҳда дорад.

Барномаи «Субҳи якшанбе», ки аз 20 бахш иборат аст, ҳар субҳи рӯзи истироҳат муддати як соат пешкаши бинанда мегардад. Рангину пурмӯҳтаво будани барнома маҳсули заҳмати муаллифи барнома Таҳмина Худойкулова, коргардони барнома Фурқат Тағоев ва гурӯҳи эчодӣ аст.

Барномаи «Муошират» бо Далери Аллома фарогири мавзӯҳои ҷолибу баҳсталаб буда аз соли 2005 инҷониб таҳия мегардад. Иштирокчиёни ин барнома сирф ҷавонон буда баҳсҳои хубу ҷолиби онҳо нишони дарки баланди маънӣ ва дониши қазоии ҷавонони кишвар аст. Саҳми коргардони барнома Фарҳод Абдуллоев низ дар таҳияи барнома арзанда аст.

Барномаи дигари Далери Аллома «Қатрае аз баҳр» маълумоту маслиҳати муфидро дар мавриди табобати бемориҳои гуногун тавассути гиёҳдармонӣ ва бо усули тибби халқӣ пешниҳод менамояд.

«Этикет» яке аз барномаҳои доимии идора буда фарогири масоили одобу ахлоқ ва меъёрҳои рафтор аст. Ҳоло барномаро Шаҳлои Раҷабалӣ таҳия менамояд.

Барномаи «Иқтисод»-и Моҳлиқо Шарифова ягона барномаест, ки дар он мавзӯҳои иқтисодӣ, вазъи иқтисодиёти кишвар, мушкилоту навоварии соҳа матраҳ мегардад. Коргардони барнома Зиё Сафаров бо идеяҳои замонавии хеш сохти барномаро диданӣ ва ба тамошобин мақбул сохтааст. Барнома дар жанри тадқиқот таҳия мегардад.

Дар барномаи «Аржанг» бошад, рӯзгор ва фаъолияти эҷодии ҳунармандону косибони тоҷик, маҳсули заҳмати фикрию тахайюли зебои онҳо инъикос мегардад. Муаллифи барнома Лутфияи Абдулазиз ҳамеша талош меварзад, то барнома дар сатҳи баланди касбӣ таҳия гардад.

Дӯстдорони санъати мусиқию театр ва олами кино маълумоти амиқу мукаммалро дар хусуси рӯзгору фаъолияти ҳунармандони машҳур тариқи барномаи «Ҷилваи ҳунар» дастрас месозанд. Таҳияи ин барномаро Дилрабо Ашурова бар дӯш дорад.

Барномаи навин бо номи «Хонадон» дар соли чори сафи барномаҳои идораро пурратар сохт. Рисолаи ин барнома тарғиби зиндагии зебо, муҳити солим дар хонадон ва тарбияи дурусти фарзанд аст. Мадина Бобоева-муаллифи барнома ва Музаффар Раҳматов-коргардони он таълифу таҳияро барномаро бар дӯш доранд.

Барномаи «Сафдар»-и Меҳроб Исроилов барномаи таҳлилии варзишӣ буда бозгӯи таърихи намудҳои варзиш, вазъи варзишу имконияти варзишгарони кишвар аст. Бурди ин барнома кӯшишҳои коргардони барнома Музаффар Раҳматов мебошад.

«Созу роз» лоиҳаи ҷадиди телевизионӣ буда майдони завқу ҳунар, сӯҳбати озоду ошкорои ҳунармандон бо тамошобинон аст. Барнома аз бахшҳову шартҳои ҷолиб иборат буда, муаллиф Моҳлиқо Шарифова ва коргардон Зиё Сафаров бо такя ба талабу хоҳиши тамошобин онро таҳия месозанд.

Барномаи варзишии «Далерон» низ ба тозагӣ рӯи кор омада шурӯъ аз таърихи ин ва ё он намуди варзиш то рӯзгори варзишгарони муваффақи Тоҷикистон ва чаҷон маълумот медиҳад. Таҳияи барнома бар дӯши яке аз кормандони ҷавонтарини идора Анушервон Саидов мебошад.

Яке аз лоиҳаҳои нав дар соли 2012 ин барномаи «Кашшоф»-и Дилшод Алсамадов аст. Аз номаш пайдост, ки барнома дар хусуси дастоварду кашфиётҳои бузурге, ки инсон тӯли таърих ба даст овардааст, қисса мекунад.