Кумитаи ҷавонон, варзиш ва сайёҳии назди Ҳукумати Ҷумҳурии Тоҷикистон ба истиқболи 20- солагии Истиқлолияти давлатӣ як қатор чорабиниҳоро ба нақша гирифтааст.
Душанбе, 22 июн. - Аз ҷумла, аз санаи 4 то 8 июли соли ҷорӣ дар шаҳри Роғун мусобиқаи ҷумҳуриявӣ оид ба шашакаи «64»-ро миёни ҷавондухтарон ва ҷавонписарон доир менамояд. Дар назар аст, ки дар чорабинӣ дастаҳои вилоёти Суғд, Хатлон, шаҳри Душанбе ва навоҳии тобеи марказ ширкат намоянд.
Аз санаи 15 то 17 июли соли равон бошад, мусобиқаи ҷумҳуриявӣ оид ба тенниси рӯйи миз, шоҳмот,шашка ва вазнбардорӣ байни варзишгарони маъюб доир мегардад. Дар ин чорабинӣ ширкати дастаҳо аз шаҳри Душанбе, вилоятҳои Хатлон, Суғд, ВМКБ ва навоҳии тобеи марказ дар назар аст.
Ҳамчунин аз санаи 5 то 8 июли соли равон мусобиқаи минтақавӣ оид ба футбол байни наврасони солҳои таваллуди 1996-1997 доир мегардад. Дар чорабинӣ дастаҳо аз водии Рашт (Тавилдара, Рашт, Тоҷикобод, Ҷиргатол, Нуробод) ва шаҳри Роғун ширкат хоҳанд кард.
