Душанбе, 6 июн. (МД ТВ"Сафина", Мирхон Ҳусейнов ). - Ин мусобиқа, ки дар шаҳри Бухарести Руминия баргузор гардид, паҳлавони тоҷик дар сабқати мардон дар вазни то 73 килограм пирўзиро ба даст овард.
Расул Боқиев нахуст бар рақибаш Стефан Бичисан, аз Руминия, ғолиб омад. Дар даврҳои баъдӣ Ҷорҷ Фернандеси Португолӣ ва Ҷонатан Аллардони фаронсавиро шикаст дод. Паҳлавони тоҷик дар даври ниманиҳоӣ Даниел Уиллямси инглисро мағлуб кард ва дар қувваозмоии финалӣ бар рақибаш Иосеф Палелашвилии исроилӣ дастболо шуд. Расул Боқиев дар ин мусобиқа соҳиби 100 имтиёз гардид ва умуман, бо 298 имтиёз дар феҳрасти ҷаҳонии дзюдо ба қатори 30 нафар беҳтарин дзюдочиён дохил хоҳад шуд.
Вале паҳлавонони дигари тоҷик Фарҳод Раҳимов, Парвиз Собиров ва Муҳаммадмурод Абдураҳмонов аз медалҳои мусобиқот бенасиб монданд. Дар сабқати мардон, ки дар доираи Ҷоми ҷаҳонӣ баргузор шуд, 253 гуштигир аз 46 кишвари дунё ширкат дошт. Даври навбатии Ҷоми ҷаҳонии дзюдо миёни мардон рӯзҳои 11-уму 12-уми июн дар шаҳри Таллинни Эстония баргузор хоҳад шуд.