Душанбе, 21 май. - Ин чорабинӣ бо ибтикори Раёсати ҷавонон, варзиш ва саёҳии шаҳри Душанбе бо иштироки сарбозону афсарони қисмҳои низомии сохторҳои қудратии марзию маъмурии ҳудуди шаҳри Душанбе гузаронида шуд.
Ҳадафи асосии фестивал-озмун тарғиби ғояҳои миллӣ ва ватанпарастона миёни ҷавонон, дӯстиву рафоқат, арҷгузорӣ ба анъанаҳои милливу таърихӣ, дастгириву ҳавасмандгардонии ҷавонони эҷодкор ва тақвияти малакаю истеъдод миёни афсарону сарбозон, рушди истеъдод ва маҳорати сарояндагии сарбозону афсарон дар жанрҳои мусиқии миллӣ ва эстрадӣ мебошад. Инчунин, доир намудани ин чорабинӣ дар самти тарбияи ҳарбӣ- ватандӯстӣ миёни ҷавонон, заминагузорӣ ба дӯстиву ҳамдилӣ, равобиту ҳамбастагӣ миёни сарбозону афсарони қисмҳои низомии сохторҳои қудратӣ, бедор намудани ҳисси баланди ватанпарастӣ дар ниҳоди насли наврасу ҷавон ва ҷалби онҳо ба хизмати ҳарбӣ, фароҳам овардани фазои фарҳангиву фароғатӣ барои сарбозони қисмҳои низомӣ, кашфи истеъдодҳои ҷавон аз байни сарбозону афсарони қисмҳои низомӣ, ҷалб ва роҳандозии ҷавонон ба хизмати ҳарбӣ равона гардида буд.
Маликшо Неъматов, Раиси Кумитаи ҷавонон, варзиш ва сайёҳии назди Ҳукумати Ҷумҳурии Тоҷикистон сухан гуфта, сарбозону афсарони қисмҳои низомиро ба муносибати Рӯзи ҷавонони Тоҷикистон табрик намуд. Дилшод Қурбонов -сардори Раёсати ҷавонон, варзиш ва сайёҳии шаҳри Душанбе аз ҳамкориҳои судманди сохторҳои низомии мамлакат дар самти татбиқи сиёсати давлатии ҷавонон дар пойтахт ва рушди тарбияи ҷисмонӣ ва варзиш изҳори сипос намуд.
Дар бахши фарҳангии чорабинӣ намояндагони дастаҳои ҳунарӣ ва овозхонҳои сохторҳои ҳифзи ҳуқуқ ва қудратии ҷумҳурӣ -Сарраёсати қушунҳои сарҳадии Кумитаи давлатии амнияти миллии Ҷумҳурии Тоҷикистон, Вазорати мудофиаи ҷумҳурӣ, Академияи милитсияи ВКД, Гвардияи миллии Ҷумҳурии Тоҷикистон, Раёсати қушунҳои дохилии ВКД ҷумҳурӣ, Кумитаи ҳолатҳои фавқулодда ва мудофиаи граждании ҷумҳурӣ, Раёсати корҳои ислоҳии Вазорати адлияи ҷумҳурӣ суруду таронаҳоро дар ситоиши ватан-модар, садоқат ба ватан, ҳифзи марзу буми сарзамин, далерию шуҷоатмандӣ ва мардонагӣ иҷро намуданд. Дар фарҷоми чорабинӣ ба иштирокчиёни фестивал- озмун тӯҳфаҳои таъсиснамудаи Кумитаи тадорукот тақдим гардид.