Рӯзҳои 14-15 апрели соли ҷорӣ дар шаҳри Бокуи Ҷумҳурии Озарбойҷон ҷаласаи Шӯрои тарбияи ҷисмонӣ ва варзиши ИДМ баргузор гардид.
Душанбе, 18 апрел. - Дар кори он аъзои шӯро- Раиси Кумитаи ҷавонон, варзиш ва сайёҳии назди Ҳукумати Ҷумҳурии Тоҷикистон Маликшо Неъматов иштирок ва суханронӣ намуд. Дар ҷаласа масъалаҳои ҳамкории кишварҳои иштирокчии ИДМ дар соҳаи тарбияи ҷисмонӣ ва варзиш мавриди баррасӣ қарор гирифтанд.
Вусъат бахшидани ҳамкориҳо ва иштирок дар чорабиниҳои варзишии кишварҳои якдигар, табодули таҷриба бо истифода аз имкониятҳои инфрасохтори варзишии кишварҳои аъзо барои омодагӣ ба бозиҳои минтақавӣ, байналмилалӣ ва ҷаҳонию олимпӣ мавзӯъҳои асосии ҷаласа буданд. Аъзои Шӯро масъалаи дар Ҷумҳурии Тоҷикистон баргузор гардидани чемпионати ИДМ оид ба кӯҳнавардиро дастгирӣ карданд.
Ёдовар мешавем, ки дар Ҷумҳурии Тоҷикистон ҳамасола чорабиниҳои варзишӣ оид ба кӯҳнавардӣ дар сатҳи баланд баргузор карда мешаванд. Чемпионати ИДМ оид ба кӯҳнавардӣ дар соли 2011 ба муносибати 20- солагии ИДМ баргузор гардида, дар он иштироки кӯҳнавардони аксарияти кишварҳои аъзои ИДМ дар назар аст.
Ҳамзамон дар рафти кори ҷаласа нақшаи чорабиниҳо бахшида ба 20- солагии ИДМ баррасӣ гардида, муҳимияти баргузории онҳо дар рушди варзиши кишварҳои аъзо зикр гардид.
