Рӯзи 20-уми январи соли ҷорӣ дар клуби варзишии VIP мусобиқаи дӯстона доир ба самбои муҳорибавӣ ва омехта байни тимҳои мунтахаби Тоҷикистон ва Русия баргузор мегардад.
Душанбе, 18 январ. - Дар муҳориба 11 ҷуфт варзишгар- 5 ҷуфт аз намуди самбои муҳорибавӣ ва 6 ҷуфт дар муҳорибаҳои омехта бо ҳам рӯи майдон меоянд. Варзишгарони тоҷик ба ин мусобиқа хеле хуб омодагӣ дидаанд. Чанде қабл онҳо дар мусобиқаи Ҷоми ҷаҳон оид ба самбои муҳорибавӣ, ки дар шахри Сочӣ барпо гардид, ширкат доштанд. Мақсад аз баргузории мусобиқаи мазкур ба ҳам наздик кардани муносибатҳои дӯстона ва ба ҳам омадани варзишгарони кишварҳои Тоҷикистону Русия мебошад.
Ғолибонро мукофотҳои таъсиснамудаи кумитаи тадорукоти мусобиқа интизор аст. Умедворем, ки варзишгарони тоҷик дар ин мусобиқаи аввалине, ки дар Душанбе мегузарад, маҳорати хуби варзишӣ нишон дода, хотири мухлисонро шод мегардонанд.
АМИТ «Ховар»
