Дар нимсолаи аввали соли ҷорӣ дар асоси нақшаи тақвими ягонаи чорабиниҳои оммавӣ, варзишӣ, солимгардонӣ ва иштироки варзишгарон дар мусобиқаҳои байналмилалӣ байни наврасон ва ҷавонон дар вилоятҳои Суғд,
Хатлон, ВМКБ, шаҳри Душанбе ва ноҳияҳои тобеи ҷумҳурӣ аз рӯи намудҳои мухталифи варзиш 56 чорабинии варзишӣ, аз ҷумла 37 мусобиқаи ҷумҳуриявӣ ва 19 мусобиқаи ҶТ бо фарогирии 5 ҳазору 734 нафар варзишгарон, аз ҷумла 720 нафар бонувон баргузор намудем,- гуфт зимни нишасти матбуотӣ ба хабарнигорони ВАО Маликшо Неъматов- раиси Кумитаи ҷавонон, варзиш ва сайёҳии назди ҳукумати ҶТ.
Мавсуф афзуд, ки варзишгарони мамлакат тӯли ин муддат дар 34 мусобиқаи байналмилалӣ (мусобиқоти ҷаҳон, Аврупо, Осиё ва ИДМ) ширкат варзида, дар маҷмӯъ 125 медал, аз ҷумла 38 медали тилло, 34 медали нуқра ва 53 медали биринҷӣ ба даст оварданд.
