Душанбе, 4 июл. - Ширин Бунёд (Хушқадам Қурбонмаҳмадов) 14 декабри соли 1941 дар деҳаи Риҷисти ноҳияи Роштқалъаи Вилояти Мухтори Кӯҳистони Бадахшон чашм ба олами ҳастӣ кушода, дар соли 1973 факултаи филологияи Донишгоҳи миллии Тоҷикистонро хатм кардааст. Баъди хатми донишгоҳ дар вазифаи муовини директори театри мусиқӣ-мазҳакавии шаҳри Хоруғ кор карда, аз соли 1976 мудири шӯъбаи маориф ва маданияти рӯзномаи вилоятии «Бадахшон» буд. Дар ин давра бо ибтикори Ширин Бунёд «Маҳфили адибони Бадахшон» таъсис дода шуд, ки дар он беш аз 40 чеҳраи шинохтаи эҷодӣ ба камол расид.

Ширин Бунёд, ки тараннумгари сулҳу ваҳдат ва ризояити ҷомеаи Тоҷикистон буд, бо эҷодиёти худ дар таҳкими сулҳу субот ва ваҳдати миллии ҷомеаи Тоҷикистон нақши равшан дошт.

Давлат ва Ҳукумати Тоҷикистон хизматҳои шоёни шоири зиндаёдро қадр намуда, ӯро бо ордени Шараф, унвони фахрии корманди шоистаи Тоҷикистон, Шоири халқии Тоҷикистон ва дигар унвонҳо сазовор донистааст.
Маросими ҷанозаи шоир дар зодгоҳаш деҳаи Риҷисти ноҳияи Роштқалъа имрӯз, 4 июли соли 2011 баргузор мегардад.