Душанбе, 28 июн. - Дар доираи ин фестивал маросими ифтитоҳи фаъолияти Арғунуни ягонаи мамлакат, ки дар толори тармимгардидаи Донишкадаи давлатии санъати Тоҷикистон ба номи Мирзо Турсунзода аз ҷониби мутахассисони кишвари Чехия таъмир гардид, доир шуд. Мавриди зикр аст, ки чунин асбоби мусиқӣ дар Тоҷикистон ягона буда, дар кишварҳои Осиёи Марказӣ ҳамагӣ се адад аст.

Арғунуни тоҷик аз кишвари Чехия харидорӣ гардида, соли 1977 дар толори Донишкадаи давлатии Тоҷикистон насб гардида буд. Ҳарчанд бо фаъолияти арғунун ба фонди тиллоии санъати мусиқии тоҷик асарҳои оҳангсозони тоҷик ворид шуда бошанд, тӯли 20 - соли охир бо сабаби корношоям гардидан арғунун аз фаъолият монда буд.

Хушбахтона, бо кӯмаку дастгирии бевоситаи Президенти мамлакат баробари таъмири хушсифати толори нави консертӣ аз тарафи мутахассисони Чехия Арғунун аз нав ба садо омад. Маросими эҳёи дубораи ин сабаб бо иштироки бевоситаи Президенти мамлакат ва иҷрои барномаҳои консертии идона ҷараён гирифт.

Бояд гуфт, ки дар ин фестивал баробари аҳли санъату эҷоди кишвар арғунуннавозони сатҳи ҷаҳонӣ - Артисти Халқии Федератсияи Россия Любов Башировна Шишханова ва Артисти Халқии Ҷумҳурии Тоҷикистон, профессор Рубин Кабирович Абдулин иштирок намуданд.

Ин ду нафар бо маҳорату малака ва сатҳи дониши худ машҳур буда, дар чорабиниҳои гуногуни фарҳангии сатҳи байналмилалӣ иштирок ва бо ҳунари волои худ сазовори баҳои баланди иштирокчиёни чорабиниҳо гардидаанд.