Душанбе, 28 июн. - Қонунҳои Ҷумҳурии Тоҷикистон «Дар бораи бозори коғазҳои қимматнок», «Дар бораи Бонки миллии Тоҷикистон», «Дар бораи молияи давлатии Ҷумҳурии Тоҷикистон», «Дар бораи Палатаи ҳисоби Ҷумҳурии Тоҷикистон», дар бораи ворид намудани тағйиру иловаҳо ба Кодекси ҳуқуқвайронкунии маъмурии Ҷумҳурии Тоҷикистон, ба Қонуни Ҷумҳурии Тоҷикистон «Дар бораи ҷавонон ва сиёсати давлатии ҷавонон», ба Қонуни Ҷумҳурии Тоҷикистон «Дар бораи мусоидат ба шуғли аҳолӣ» аз ҷумлаи онҳо мебошанд.

Қонунҳои Ҷумҳурии Тоҷикистон «Дар бораи Палатаи ҳисоби Ҷумҳурии Тоҷикистон» ва «Дар бораи барҳамдиҳии ташкилотҳои қарзӣ» қонунҳои нав буда, масъалаҳоро вобаста ба тартиби ташкил, вазъи ҳуқуқӣ, ваколат, сохтор, вазифа, ҳуқуқ ва ўҳдадориҳои Палатаи ҳисоби Ҷумҳурии Тоҷикистон, инчунин муносибатҳои ҳуқуқии татбиқ намудани раванди барҳамдиҳии ихтиёрӣ ва маҷбурӣ, аз ҷумла раванди муфлисшавии ташкилотҳои қарзиро танзим менамоянд.

Қонуни Ҷумҳурии Тоҷикистон “Дар бораи тартиб ва шароити дар ҳабс нигоҳ доштани гумонбаршуда, айбдоршаванда ва судшаванда” низ қонуни нав буда, кафолатҳои қонунии ҳифзи ҳуқуқҳои гумонбаршуда, айбдоршаванда ва судшавандаро муайян менамояд.

Қонунҳои Ҷумҳурии Тоҷикистон «Дар бораи бозори коғазҳои қимматнок», «Дар бораи Бонки миллии Тоҷикистон» ва «Дар бораи молияи давлатии Ҷумҳурии Тоҷикистон» дар таҳрири нав қабул гардида, барориш, паҳнкунӣ, гардиш ва пардохти коғазҳои қиматнок, таъсисдиҳӣ ва фаъолияти субъектҳои бозори коғазҳои қиматнок, тартиби назорати бозори коғазҳои қиматнок, ҳифзи ҳуқуқи сармоягузорон ва дорандагони коғазҳои қиматнок, рақобати иштирокчиёни бозори коғазҳои қиматнок, мақоми ҳуқуқии Бонки миллӣ ва ваколатҳои ўро дар соҳаи сиёсати пулию қарзӣ, низоми пардохт, танзиму назорати асъор, асосҳои ҳуқуқӣ, принсипҳои ташкилии идоракунии молияи давлатӣ, ба низом даровардани буҷет ва гурўҳбандии он, таҳия, ташаккул, тақсимот ва истифодаи маблағҳои марказонидашудаи пулӣ, мавқеи мақомоти идоракунии давлатӣ ва самтҳои дигари соҳаҳои зикргардидаро муайян ва муқаррар менамояд.

Қонунҳои ба имзорасида ба таъмини ҳуқуқу озодиҳои инсон, ҳимояи манфиати давлату ҷамъият, шахсони ҳуқуқӣ, беҳдошти вазъи иқтисодию иҷтимоии кишвар, аз ҷумла сиёсати пулию қарзӣ, молияи давлатӣ, назорати истифодаи маблағҳои буҷетӣ, таҳкими муносибатҳои ҷамъиятӣ ва тартиботи ҳуқуқӣ равона карда шудаанд.

Матни пурраи қонунҳои баимзорасида дар рўзномаҳои расмии кишвар ба нашр расонида мешаванд.