Масъалаи тавсеаи ҳамкорӣ дар бахши меъморӣ ва шаҳрсозӣ дар мулоқоти Раиси шаҳри Душанбе Маҳмадсаид Убайдуллоев бо ҳайати меъморони шаҳри Москва дар Душанбе баррасӣ гардид.
Душанбе, 23 июн. - Мавриди зикр аст, ки ҳайати мазкур таҳти сарварии муовини якуми директори генералӣ оид ба иқтисодиёти КВД «Моспроект-3»-и Кумитаи меъмории шаҳри Москва Олег Плетнев, дар асоси тафоҳумоти зимни сафари Маҳмадсаид Убайдуллоев ба шаҳри Маскав бо Мири Москва Сергей Собянин бадастомада, озими Душанбе гардидаанд.
М. Убайдулллоев гуфт, ки шаҳрдории Душанбе барои ҷалби потенсиали меъморони Москва барои тасҳеҳи Нақшаи генералии Душанбе ва тарҳрезии лоиҳаҳои муосири меъморӣ, ки таҷассумкунандаи арзишҳои миллӣ ва ҷаҳонӣ бошанд бо назардошти татбиқи Нақшаи генералӣ дар хиёбони Рӯдакӣ оғоз гардидааст, аҳамияти хоса медиҳад.
Раиси шаҳр дар робита ба ташрифи меъморони москвагӣ ба масъулини марбутаи соҳаи шаҳрдорӣ дастур дод, ки зимни пажӯҳиши якҷоя нисбат ба таҳияи консепсияи рушди меъморӣ-ландшафтӣ, ороишу мукаммалсозии муосири намои берунаи биноҳо дар шаҳр, дар навбати аввал дар қисмати марказии пойтахт унвонии Раиси шаҳр таклифҳои асоснок ирсол намоянд.
Котиби матбуоти Раиси шаҳр Шавкат Саидов иттилоъ дод, ки ҳайати мазкур то оғози ҳафтаи оянда бо ҳамкасбони душанбегии худ фаъолияти якҷоя анҷом медиҳанд.
