Дар интихоботи парлумонӣ, ки чанде пеш дар Туркия баргузор гардид, Ҳизби ҳокими мамлакат - Ҳизби адолат ва рушд бо роҳбарии Сарвазири Туркия Реҷеп Эрдуғон, бо гирифтани 50,2% пирӯз гардид.
Анқара, 14 июн. - Ҷойи дуюмро Ҳизби халқӣ-ҷумҳуриявӣ бо гирифтани 25,8% ва ҷойи сеюмро Ҳизби ҳаракати миллӣ бо гирифтани 13% овоз ишғол намуданд. Номзадҳои мустақил бошад, 6,2% овозро ба даст оварданд. Аҳзоби дигаре, ки дар интихобот иштирок доштанд аз 1 % ҳам камтар овоз гирифтанд.
Аз рӯи натиҷаҳои интихобот дар ҳайати 550 нафараи Маҷлиси Миллии Бузурги Туркия 327 вакил аз Ҳизби адолат ва рушд, 135 нафар аз Ҳизби халқӣ-ҷумҳуриявӣ, 54 нафар аз Ҳизби ҳаракати миллӣ ва 34 нафар вакили мустақил шомил шуданд.
Ёдовар мешавем, ки Ҳизби адолат ва рушди Туркия бори саввум аст, ки дар интихоботи парлумонӣ пирӯзӣ ба даст меорад. Ҳизби адолат ва рушд аз соли 2002 инҷониб дар сари қудрат қарор дошта, дар интихоботи охирин, ки моҳи июни соли 2007 доир гардида буд, 47%-и овози интихобкунандагонро ба даст овард.
