Душанбе, 13 июн. - Мақсади асосии ташкили ин ярмарка танзими нарх ва пешгирии болоравии он мебошад. Дар ярмарка 28 тонна маҳсулоти гуногуни кишоварзӣ ва 1,2 тонна гӯшт ба фурӯш бароварда шуд.

Мавриди зикр аст, ки ташкили ярмаркаи маҳсулоти кишоварзӣ дар пойтахт аз 10-уми май шурӯъ гардида, то имрӯз 1000 тонна маҳсулоти ниёзи мардум пешниҳод шудааст. Аз ҷумла, 35 тонна гӯшт, 204 тонна картошка, 347 тонна пиёз ва 70 тонна сабзиву дигар сабзавот, ки ба танзими нархҳо то ҷое бошад ҳам, мусоидат карданд.

Бо дарназардошти болоравии нарҳхо ва мувофиқи омӯзиши талабот ба бозори «Шоҳмансур» ҳамарӯза 1 тоннаву 200 килограм гӯшт ворид мегардад. Дар ҳолати норасоӣ ва камчин будани анвои гуногуни маҳсулоти кишоварзӣ, бахусус гӯшт, аз ҳисоби захираҳои мавҷудаи Иттифоқи «Тоҷикматлубот», ки дар анборҳо нигаҳдорӣ мешаванд, ба бозор бароварда мешавад.