Ояндаи наздик Корея дар бахши истеҳсоли меваи хушк, бастабандӣ ва содироти он ба кишварҳои хориҷӣ бо Тоҷикистон ҳамкории судмандро ба роҳ мемонад.
Душанбе, 10 июн. - Масъалаи мазкур дар меҳвари мулоқоти Шукурҷон Зуҳуров, Раиси палатаи поёнии парлумони Тоҷикистон ва муовини директори генералии Раёсати рушди соҳаи кишоварзии Корея Кан Сан Зо қарор дошт.
Шукурҷон Зуҳуров намояндаи масъули бахши кишоварзии Кореяро бо шароити аграрии Тоҷикистон, хусусан дастовардҳои кишоварзони он бо маълумоти муфасаал шинос намуд. Мавсуф гуфт, ки Тоҷикистон бо мавқеи ҷуғрофиаш кишвари аграрӣ буда, дар шароити иқлими мамлакати мо тамоми навъҳои маҳсулоти кишоварзӣ парвариш ва рӯёнида мешаванд.
Мусоҳибон дар ҷараёни мулоқот маҷмӯи масъалаҳои ба роҳ мондан ва тавсеаи ҳамкориҳои кишоварзиро байни Тоҷикистону Корея баррасӣ намуда, дар ин самт пешниҳодҳои самарабахшу ҷолиб баён доштанд.
Ёдовар мешавем, ки сафари Шукурҷон Зуҳуров ба Корея то 12 июни соли ҷорӣ идома меёбад.
