Тибқи ворид намудани тағйиру иловаҳо ба Қонуни Ҷумҳурии Тоҷикистон «Дар бораи мусоидат ба шуғли аҳолӣ» минбаъд маъюбоне, ки кӯмакпулии давлатӣ мегиранд, шахсони бекор эътироф гардида, дар асоси қонунгузорӣ онҳо ҳуқуқи кор карданро доранд.
Душанбе, 3 июн. - Дар робита ба ин Ҳукумати мамлакат сохторҳои давлатиро муваззаф сохтааст, ки барои бо ҷойи кор таъмин намудан ва қабули маъюбон ба кор тадбирҳо андешида ҷой ҷудо намоянд.
Бояд тазаккур дод, ки палатаи поёнии парлумони мамлакат ахиран дар ҷаласаи навбатии худ ба лоиҳаи қонуни мазкур тағйиру иловаҳо ворид намуд. Маҳмадамин Маҳмадаминов, вазири меҳнат ва ҳифзи иҷтимоии аҳолии ҷумҳурӣ ва Сабоҳат Муқумова, вакили Маҷлиси намояндагон зимни ташреҳи масъалаи мазкур гуфтанд, ки қонуни мазкур бо мақсади танзими асосҳои ҳуқуқии шуғли аҳолӣ, тартиби аз ҷониби мақомоти давлатии шуғли аҳолӣ расонидани кӯмакҳои молиявӣ ба шаҳрвандони бекор ва муҳоҷирони меҳнатӣ, ки хоҳиши ба фаъолияти соҳибкорӣ машғул шуданро доранд, таҳия шудааст. Инчунин, ин қонун шартҳо ва мӯҳлати пардохти кӯмакпулӣ барои бекорӣ, тартиби тамдиди мӯҳлати пардохти кӯмакпулӣ барои бекориро ба шаҳрвандони дорои собиқаи корие, ки барои ба нафақа баромадан ҳуқуқ доранд, ба танзим медарорад.
Дар ҷаласаи палатаи поёнии парлумони мамлакат вакилон Созишнома миёни Тоҷикистону Ҷумҳурии Австрия дар бораи ҳавасмандгардонӣ ва ҳифзи мутақобилаи сармоягузорӣ ва Созишномаи тартиби таъминоти молиявӣ, техникӣ ва ақибгоҳии фаъолият ва ҳайати қувваҳои дастаҷамъии нигоҳдори сулҳ дар Иттиҳоди Давлатҳои Мустақилро баррасӣ ва тасдиқ намуданд.
