Душанбе, 31 май. - Дар хатсайрҳои боқимондаи микроавтобусҳо №1, 2, 4, 7, 8, 10, 13, 14, 15, 16, 17, 18, 19, 25, 28, 33, 44, 52 ва 54, ки масофаи хизматрасонияшон то 18 км-ро дар бар мегирад, ба ду хатсайри алоҳида тақсим гардида, дар маҷмӯъ ба ҷои 19 хатсайр 38 хатсайри нав таъсис дода мешавад. Фаъолияти ин микробавтобусҳо бо рақамгузории ба таври мисол 1 ва 1-«а» ба танзим дароварда шуда, нархи хизматрасонӣ 80 дирам муқаррар гардид.
Нархи роҳкиро дар автобусҳои хатсайри №№ 3-«а», 11, 14, 20, 23, 26, 27, 30 бетағйир, яъне 60 дирам боқӣ монда, хатсайрҳои №№ 1, 2, 6, 7, 8, 8-«а», 13, 18, 28 ва 41 бо нархи 1 сомонию 20 дирам фаъолият хоҳанд кард.
Масъалаи мазкур дар ҷаласаи шаҳрдорӣ, ки дар ҳузури Маҳмадсаид Убайдуллоев - Раиси шаҳри Душанбе доир шуд, баррасӣ гардид. Таъкид шуд, ки ҷорӣ намудани дифференсатсия оид ба пардохти ҳаққи хизматрасонӣ дар хатсайрҳо бо инобати фосилаи истифодаи нақлиёт ҷиҳати ҳимояи ҳуқуқи мусофирон ногузир аст. Аз ин рӯ, ба Қарори марбутаи Раиси шаҳр аз 24 майи соли 2011 «Дар бораи тарифҳои ҳамлу нақли мусофир дар шаҳри Душанбе» тағйирот ворид карда шуд.
Дар асоси ворид намудани тағйирот ба қарори мазкур дар ҳама хатсайрҳои мусофиркашонӣ бо истифода аз микроавтобусҳою автобусҳо бо тарифи 1 сомонию 60 дирам ва 1 сомонию 20 дирам фаъолияташон чун «экспресс» ташкил карда мешавад.
Ба масъулин дастур дода шуд, ки бобати ҳимояи ҳуқуқи мусофирон дар ҳама намуди нақлиёти ҷамъиятӣ аз 1 июни соли 2011 фурӯши чиптаҳо зери масъулияти роҳбарони корхонаҳо ва ҷамъиятҳои ба мусофиркашонӣ машғулиятдошта вогузор шуда, назорати қатъии ҷамъиятӣ аз болои фаъолияти тамоми хатсайрҳо таъмин карда шавад.
Дар робита, ситоди шаҳрӣ бо телефонҳои боварии шабонарӯзии 223-22-14, 221-26-95 ва 221-28-65 зери масъулият ва роҳбари муовини соҳавии Раиси шаҳр А.Оев созмон дода шуд. Дар мавриди нисбати дилхоҳ хатсайр ҷиҳати риоя нагаштани сифату фарҳанги хизматрасонӣ унвонии шаҳрдорӣ пайи ҳам 3 маротиба шикояти асоснок ворид гардидан, хатсайр аз ҷамъият ё корхонаи коммуналӣ гирифташуда, ба дигар ширкатҳои литсензияи фаъолиятдошта дода мешавад.
