Душанбе, 26 май. - Низом Ҳакимов, вазири нақлиёт ва коммуникатсияи ҷумҳурӣ масъалаи зикргардидаро ташреҳ дода гуфт, ки Конвенсия 15 ноябри соли 2001 дар конфронси дипломатӣ дар шаҳри Кейптауни Ҷумҳурии Африқои Ҷанубӣ ба имзо расидааст.

Конвесияи Кейптаун бо мақсади ҳал намудани 5 масъалаи асосӣ таҳия шудааст. Инҳо танзими кафолатҳои байналмилалии эътирофшудаи аъзои Конвенсия, пешниҳоди роҳҳои гуногуни ҳифзи ҳуқуқҳо ҳангоми аз ҷониби қарздорон, асосан ширкатҳои авиатсионӣ иҷро нагардидани ӯҳдадориҳои шартномавӣ, аз ҷумла аз нав ба қайдгирӣ ва баргардонидани ҳавопаймоҳо, таҳияи феҳристи байналмилалии электронии кафолатҳои байналмилалие, ки ба қарздиҳандиҳанда афзалиятҳои ҳуқуқӣ дода, ба иншооти авиатсионӣ қарздиҳандиҳандагони ҳуқуқҳои амволи худро ба қайд гирифтан ва ё нагирифтанро таъмин менамояд.

Конвенсияи мазкур ба рушди авиатсияи гражданӣ, роҳи оҳан ва дигар иншооти кайҳонӣ мусоидат менамояд. Ҳамзамон, он ҳавасманд намудани қарздиҳандагони иншооти авиатсионӣ барои маблағгузорӣ ва паст намудани хароҷоти ҷонибҳои манфиатдор оид ба шартномаҳои муомилотро ба танзим медарорад.

Яке аз афзалиятҳои ин санад соддагардонии тартиби маблағгузории таҷҳизоти мутаҳаррики гаронбаҳои воридшавандаи воситаҳои иншооти авиатсионӣ, роҳи оҳан ва иншооти кайҳонӣ аст.

Ҳамроҳшавии Ҷумҳурии Тоҷикистон ба ин Конвенсия афзалияти бештар дошта, он ба афзоиши сармоягузории хориҷӣ, баланд бардоштани сатҳи бехатарӣ дар мавриди бастани шартномаҳо, коҳиши фоизи қарзҳо, зиёд шудани шумораи мусофирон, пешниҳоди сабукӣ дар мавриди ҷалби қарзҳо, рушди соҳаи лизинг дар Тоҷикистон, баланд бардоштани маҳорати касбӣ ва иқтидори лизинггирандагон дар Тоҷикистон, ҳифзи ҳуқуқҳои ширкатҳои авиатсионӣ мусоидат менамояд.
Бояд тазаккур дод, ки беш аз 50 давлати ҷаҳон ба Конвенсияи Кейптаун ҳамроҳ гардидаанд.