Дар ҷаласаи навбатии иҷлосияи дуюми Палатаи поёнии парлумони Тоҷикистон ба лоиҳаи Қонуни Ҷумҳурии Тоҷикистон «Дар бораи рамзҳои давлатии Ҷумҳурии Тоҷикистон» тағйирот ворид карда шуд.
Душанбе, 26 май. - Ҳабибулло Саъдуллоев, намояндаи мардумӣ дар парлумон зимни баромадаш дар назди вакилон гуфт, ки мақсади ворид намудани тағйирот ба лоиҳаи қонуни мазкур аз байн бурдани мухолифатҳои дар қонуни «Дар бораи рамзҳои давлатии Ҷумҳурии Тоҷикистон» ҷойдошта аст. Зеро моддаи 4 ба муқаддима ва ба моддаи 2 ва 7 мутобиқат намекунад. Чунончи дар муқаддимаи қонуни мазкур омадааст, ки қонун моҳият ва тартиби истифодаи расмии парчам, нишон ва суруди миллиро муқаррар мекунад. Тибқи моддаи 2 парчам, нишон ва матну оҳанги суруди миллиро Маҷлиси намояндагони Маҷлиси Олии Ҷумҳурии Тоҷикистон тасдиқ менамояд. Дар моддаи 7 тартиби истифодаи нишони давлатӣ муқаррар шудааст.
Дар моддаи чори лоиҳаи қонун, ки дар таҳрири нав пешниҳод карда шуд, тибқи он тартиби тайёр кардани парчам ва нишони давлатии Ҷумҳурии Тоҷикистон аз тарафи Ҳукумати Ҷумҳурии Тоҷикистон муқаррар карда мешавад.
