Душанбе, 25 май. - Дар робита ба ин 24 май Маҳмадсаид Убайдуллоев Раиси шаҳри Душанбе қарорро дар мавриди тарифҳои ҳамлу нақли мусофирон тавассути нақлиёти ҷамъиятӣ дар пойтахт ба тасвиб расонид. Тибқи ин қарор барои як мусофир дар автобус 1 сомонию 20 дирам, дар троллейбус 70 дирам, микроавтобуси ГАЗел (бо бензин) 1 сомониву 60 дирам, микроавтобуси ГАЗел ( бо гази моеъ) 1 сомониву 20 дирам, микроавтобуси Hyundai Starex 1 сомониву 60 дирам муайян гардид.

Бояд тазаккур дод, ки ин тадбир бо мақсади мӯътадил гардонидани фаъолияти нақлиёти мусофирбари ҷамъиятӣ дар пойтахт, баланд бардоштани сатҳи хизматрасонӣ ба аҳолӣ, зиёд намудани музди меҳнати ронандагон бо дарназардошти боло рафтани нархи сӯзишворӣ ва қисмҳои эҳтиётӣ дар асоси хулосаи Хадамоти зиддиинҳисории назди Ҳукумати Ҷумҳурии Тоҷикистон андешида шудааст.

Дар асоси Қарори марбута, ҳамзамон арзиши чиптаи моҳона барои донишҷӯён муқаррар шуд. Аз ҷумла, нархи чиптаи моҳона барои донишҷӯён дар автобус 28 сомонӣ, барои троллейбус 21 сомонӣ аст. Арзиши чипатаи моҳонаи ягона бошад (барои автобус ва троллейбус) 32 сомонӣ ва барои дигарон тавассути автобусҳо 36 сомонӣ, барои троллейбус 27 сомонӣ муайян шуд. Нархи чиптаи ягона, яъне ҳам барои автобус ва троллейбус 42 сомонӣ муқаррар гардид.