Аз 1 июни соли равон тарифҳои хизматрасонӣ дар нақлиёти мусофиркашонии ҷамъиятӣ дар пойтахт тағйир дода мешаванд.
Душанбе, 24 май. - Ин масъала 23 май дар ҷаласаи шаҳрдорӣ, ки дар ҳузури Маҳмадсаид Убайдуллоев, Раиси шаҳри Душанбе баргузор шуд, матраҳ гардид. Зикр шуд, ки ин тадбир, яъне баланд гардидани нархи роҳкирои нақлиёти ҷамъиятӣ дар пойтахт дар асоси хулосаи Хадамоти зиддиинҳисории назди Ҳукумати Ҷумҳурии Тоҷикистон бо дарназардошти болоравии нархи маводи сӯзишворӣ андешида шудааст.
Доир ба чанд фисад баланд гардидани нархи роҳкиро дар нақлиёти мусофиркашонии ҷамъиятии пойтахт ҳанӯз иттилоъ вуҷуд надорад. Бояд тазаккур дод, ки тарифҳои мавҷуда аз 1 июни соли 2008 дар пойтахт амал дошта, дар ин муддат нархи сӯзишворӣ ва равғанҳои молиданию қисмҳои эҳтиётӣ ба маротиб баланд гаштаанд.
