Душанбе, 18 май. - Дар ин ҷаласа масоили бақайдгирии вакили аз нав интихобшудаи Маҷлиси намояндагони Маҷлиси Олии Ҷумҳурии Тоҷикистон дар ҳавзаи якмандатии интихоботии Сино №4-и шаҳри Душанбе ва гузориши роҳбари дастгоҳи Комиссияи марказии интихобот ва райъпурсии Ҷумҳурии Тоҷикистон Муҳибулло Додоҷонов оид ба ҷамъбасти интихоботи вакили Маҷлиси намояндагони Маҷлиси Олии ҶТ ба ивази вакили хориҷшуда дар ҳавзаи якмандатии интихоботии Сино №4 муҳокима ва баррасӣ гардид.

Дар гузориши роҳбари дастгоҳи КМИР М. Додоҷонов аз ҷумла зикр гардид, ки мутобиқи ҷамъбасти натиҷаҳои интихобот дар ҳавзаи якмандатии интихоботии Сино №4 аз 68266 нафар интихобкунандагон 55207 ё ки 81% иштирок намуда, ба тарафдории Азимов А.Н. 35162 нафар, ё ки 62,89%, ба Манонов С.Т. 5534 нафар ё ки 9,9%, ба Мирзоев М.Б. 4243 нафар ё ки 7,59%, ба Саидов Т.Б. 8942 нафар ё ки 15,99% ва зидди ҳамаи номзадҳо бошад, 1151 нафар ё ки 2,16% овоз доданд.

Ҳамин тавр Азимов Амирқул Насимович, соли таваллудаш 1948, ки аз тарафи Конференсияи ҲХДТ пешбарӣ шуда буд, аз ин ҳавза вакили Маҷлиси намояндагони Маҷлиси Олии Ҷумҳурии Тоҷикистон интихоб гардид.

Комиссияи марказии интихобот ва райъпурсии Ҷумҳурии Тоҷикистон қарор қабул кард, ки Азимов Амирқул Насимович, ки 15 майи соли 2011 дар ҳавзаи якмандатии интихоботии Сино №4, вакили Маҷлиси намояндагони Маҷлиси Олии Ҷумҳурии Тоҷикистон интихоб шудааст, ба қайд гирифта шуда, ваколати ӯ тасдиқ карда шавад.

Инчунин, Комиссияи мазкур қарор қабул кард, ки гузориши роҳбари дастгоҳи Комиссияи марказии интихобод ва райъпурсии Ҷумҳурии Тоҷикистон Муҳибулло Додоҷонов оид ба ҷамъбасти интихоботи вакили Маҷлиси намояндагони Маҷлиси Олии ҶТ ба ивази вакили хориҷшуда дар ҳавзаи якмандатии интихоботии Сино №4 ба инобат гирифта шавад.