Хоруғ, 18 май. - Ҳамаи иншоот аҳамияти иқтисодию иҷтимоӣ ва фарҳангӣ дошта баробари мавриди истифода қарор гирифтани онҳо 1000 нафар бо ҷойи кор таъмин мешаванд. Тавре сармеъмори ҳокимияти давлатии вилоят Ҳайдар Гулмаҳмадов иттилоъ дод, аз 58 иншоот 15 – тоаш аллакай мавриди истифода қарор гирифтааст.
Дар байни ин иншоот хонаи 24 ҳуҷрадор дар шаҳри Хоруғ, Қасри фарҳанг дар Новоз, мактаби миёнаи мавзеи Сурхсангов дар ноҳияи Ванҷ, азхудкунии 64 га замини бекорхобида дар ноҳияи Рӯшон ҳастанд.
Бунёди 43 иншооти ҷашнӣ то охири моҳи июн ба анҷом мерасанд. Дар байни 43 иншоот гимназия- интернати Президентӣ дар шаҳри Хоруғ, мактаб – интернат барои 650 тан ятимону фарзандони оилаҳои камбизоат, бинои Донишкадаи такмили ихтисоси муаллимони ВМКБ, варзишгоҳ дар ноҳияи Ванҷ барои 5000 ҷои нишаст, нерӯгоҳҳои барқи обии «Ширг- 2» -и ноҳияи Дарвоз, «Чадуд» - и ноҳияи Рӯшон, «Тусён- 3» - и ноҳияи Роштқалъа мебошанд.
