Дар майдони 800 – солагии Маскави ноҳияи Шоҳмансур ба ифтихори 20 – солагии Истиқлолияти Ҷумҳурии Тоҷикистон намоиш ва фурӯши маҳсулоти кишоварзони ноҳияи Рашт баргузор гардид.
Душанбе, 17 май. - Дар ин намоишгоҳ аз 14 ҷамоати деҳот ва шаҳраки ноҳияи Рашт намояндагону кишоварзон иштирок доштанд. Дар намоишгоҳ маҳсули ҳунари волои 14 ҷамоати деҳоти ноҳия ба маърази тамошо гузошта шуд. Дар расми ифтитоҳи намоишгоҳ Раиси Маҷлиси намояндагон Шукурҷон Зуҳуров, раиси ноҳияи Рашт Саидумрон Абдураҳмонов ва раиси ноҳияи Шоҳмансур Фатҳулло Бӯриев иштирок намуданд.
Меҳмонону тамошобинон аз ҳунари воло ва маҳсули дастони кишоварзон, эҷодиёти мактабиён, маҳсулоти қаннодии ҷамъияти матлуботи ноҳия, дастовардҳои меҳнатии мардуми ҷамоати деҳоти Нусратулло Махсум, ҷамоати деҳоти Ҳоит, ҷамоати деҳоти Такоба, ҷамоати деҳоти Ҷафр, ҷамоати деҳоти Қалъанак дидан намуда, ба ҳунари онҳо баҳои баланд доданд.
Бояд гуфт, ки занҳои ноҳияи Рашт аз қадимулайём дорои ҳунари хуби дастархонороӣ буда, бо пухтани нонҳои калонҳаҷм, қаламафатир ва дигар ҳунарҳои аҷдодӣ машҳуранд. Дар намоишгоҳ асали беҳтарини асалпарварон, меваҳои хуштаъм, маҳсулоти ширӣ ва шириниҳо бо нархи нисбатан арзон ба фурӯш бароварда шуданд.
