Ҳайати 120 нафараи Ҷумҳурии Тоҷикистон, ки аз кормандони вазорату идораҳои гуногуни давлатӣ, шахсиятҳои фарҳангӣ- донишмандону устодони макотиби олии мамлакат, васоити ахбори омма ва созмонҳои ҷамъиятӣ иборат буд, аз Ҷумҳурии Исломии Эрон баргашт.
Душанбе, 17 май. - Сафари ҳайати фарҳангиёни Тоҷикистон ба ин кишвар бо мусоидати cафорати Ҷумҳурии Исломии Эрон дар Ҷумҳурии Тоҷикистон сурат гирифт. Намояндагони Тоҷикистон тӯли як ҳафта аз бистучорумин намоишгоҳи байналмилалии «Китоби Теҳрон», ки аз бузургтарин чорабиниҳои фарҳангии ин кишвар маҳсуб меёбад, боздид намуда, бо сафири Ҷумҳурии Тоҷикистон дар Ҷумҳурии Исломии Эрон Давлаталӣ Ҳотамов ва Раиси Анҷумани дӯстии Тоҷикистону Эрон Алиашраф Муҷтаҳиди Шабистарӣ, ки нахустин сафири фавқулодда ва мухтори Ҷумҳурии Исломии Эрон дар Ҷумҳурии Тоҷикистон буд, мулоқот намуданд.
Намояндагони Тоҷикистон ҳамзамон аз шаҳрҳои қадимии Эрон, ба мисли Теҳрон, Исфаҳон ва Кошон боздид намуда, бо ёдгориҳои таърихии ин шаҳрҳои бостонӣ, ба монанди Кохи Саъдобод, Кохи Гулистон /Теҳрон/, Майдони Нақши Ҷаҳон, Масҷиди шайх Лутфулло, Манораи Ҷунбон, Кохи Чилсутун, Сиву се пул, Пули Ҳоҷу /Исфаҳон/ ва Боғи Фин /Кошон/ дидан намуда, бо хотироти нек ба ватан баргаштанд.
