Душанбе, 17 май. - Пас аз мулоқот вазири корҳои хориҷии Литва Аудронюс Ажубалис андешаҳояшро ба хабарнигорон мухтасар баён намуда гуфт, ки «Ман мехоҳам барои ҳамкориҳои зичи байни Тоҷикистон ва Созмони амният ва ҳамкорӣ дар Аврупо ба ҷониби Тоҷикистон изҳори ташаккур намоям ва ҳамзамон бояд ҳамкориҳои мутақобилан судмандро байни Тоҷикистону Аврупо боз ҳам мустаҳкам намоем».

«Ин вохӯрӣ бори дигар тасдиқ намуд, ки байни созмони мо ва Тоҷикистон ҷиҳати ҳамкориҳо ҳамдигарфаҳмии кулл вуҷуд дорад. Ёдовар мешавем, ки Тоҷикистон кишварест, ки ҷиҳати ҳамкорӣ бо созмони мо асосӣ маҳсуб меёбад. Тасдиқи ин гуфтаҳо он аст, ки дар Тоҷикистон намояндагии хеле калони ин созмон ҷойгир аст ва фаъолият мекунад. Ман зимни мулоқоти худ бо президент бори дигар саҳми Тоҷикистонро дар кори ба танзим даровардани вазъи Афғонистони ҳамсоя қайд намудам. Инчунин нақши муҳими Тоҷикистон дар мавриди аз байн бурдани интиқоли ғайриқонунии маводи мухаддир аз Афғонистон низ назаррас аст», - афзуд ӯ.

Созмони мо ҳамкории худро бо Тоҷикистон дар соҳаҳои мухталиф, аз ҷумла мубориза бар зидди коррупсия, гардиши ғайриқонунии маводи мухаддир, ислоҳот дар соҳаи милитсия, волоияти қонун ва озодии баён идома хоҳад дод, - илова намуд Аудронюс Ажубалис.

Ҳамчунин ӯ зикр намуд, ки «мо ҳамкории худро ҷиҳати омӯзонидани кадрҳо барои дифоъи сарҳад низ ба роҳ мемонем. Ман ҳис мекунам, ки Тоҷикистон кӯшиш мекунад дар ин самт корҳои зиёдро анҷом диҳад. Аз сабаби он, ки сарҳадҳои Тоҷикистонро бештар кӯҳсор ташкил медиҳанд ва ҳимояи ин гуна сарҳадҳо душвор мебошад, аз ин рӯ ба Тоҷикистон лозим аст, ки на танҳо бо Созмони амнияту ҳамкорӣ дар Аврупо, ки дар ин самт таҷрибаи кам дорад, балки бо дигар кишварҳо ҷиҳати рафъи ин мушкилот ҳамкорӣ кунад.

Ман аз ҳамкорони худ мехоҳам, ки рӯйхати он чорабиниҳоеро, ки метавонанд дар ин самт мушкилотро аз байн баранд, тартиб диҳанд ва мо метавонем ин рӯйхатро ба Созмони Паймони Атлантикаи Шимолӣ ва Иттиҳоди Аврупо пешниҳод намоем.

«Мо мехоҳем ҳамчунин корҳои муфидро, аз қабили таъсиси коллеҷ барои омӯзонидани мутахассисони соҳаи сарҳадбонӣ низ ба роҳ монем. Ва ман дидам, ки дар ин самт Ҳукумати ҷумҳурии шумо имкониятҳои зиёд барои истифода дорад. Зимнан ман аз ҳамкорони худ аз Тоҷикистон хоҳиш мекунам, ки доир ба ҳуқуқи инсон ва озодии дин корҳои худро вусъат диҳанд ва бо созмони мо ҳамкорӣ намоянд.

Ман зимни сӯҳбати худ бо президент масъалаи озодии баёнро зикр намудам, ки бояд ин ниҳод бо меъёрҳои демократии кишвар мутобиқат намояд.

Ман умедворам, ки мо ҳамкории худро бо Тоҷикистон дар соҳаҳои гуногун ба роҳ мемонем. Ин ҳамкориҳо ҳам дар соҳаҳои байналмилалӣ ва ҳам дар сатҳи минтақавӣ ҷараён мегиранд.

Ман нақши Созмони амният ва ҳамкории Аврупоро ҳамчун саҳнаи ҳамкориҳои муфид байни минтақа ва кишварҳо медонам. Барои рушди ҳамкориҳо дар минтақа барои мо сабр даркор аст то ба муваффақият ноил гардем»,- таъкид намуд дар охир вазири корҳои хориҷии Литва Аудронюс Ажубалис.