Душанбе, 12 май. - Дар ҷараёни мулоқот ҳолати кунунӣ ва дурнамои ҳамкориҳои байнипарлумонии кишварҳо баррасӣ гардида, барқарор намудани фаъолияти дуҷонибаи комиссияҳои байнипарлумонии Тоҷикистону Украина зикр гардид. Дар робита ба таҳкими масъалаҳои дуҷониба, аз ҷумла ҳамкориҳо дар соҳаи гидроэнергетика, ривоҷи иншооти хурди обӣ, ҷоннок кардани фаъолияти Комиссияи иқтисодии байниҳукуматӣ, зиёд намудани квотаи донишҷӯён дар донишкадаҳои олӣ ва ба роҳ мондани ҳамкориҳои сатҳи минтақавӣ бо истифода аз имкониятҳои кишвари иқомат ҷонибҳо ибрози назар намуданд.

Ҳамчунин худи ҳамон рӯз мулоқоти сафир Ш. Султонов бо роҳбари Гурӯҳи байнипарлумонии Радаи Олӣ Павел Унгурян доир гардид.

Зимни вохӯрӣ П. Унгурян омодагии гурӯҳро барои ҳамкорӣ бо Парлумони Тоҷикистон қайд намуда, зарурати ба роҳ мондан ва барқарор сохтани муносибатҳои байнипарлумонии кишварҳоро таъкид кард.

Қобили зикр аст, ки гурӯҳи байнипарлумонии ҳамкорӣ бо Ҷумҳурии Тоҷикистон мутобиқи Қарори Радаи Олии Украина аз 8 ноябри соли 2010 ташкил шудааст, ки дар он намояндагони панҷ гурӯҳи (фраксияи) вакилӣ амал мекунанд. Ҳамчунин, мутобиқи Қарори Шӯрои Маҷлиси намояндагони Маҷлиси Олии Ҷумҳурии Тоҷикистон аз 10 январи соли 2011 Гурӯҳи дӯстӣ ва ҳамкории Маҷлиси намояндагони Маҷлиси Олии Ҷумҳурии Тоҷикистон бо Радаи Олии Украина таъсис ёфтааст.