Душанбе, 6 май. - Д. Саидов дипломати Ҷопонро бо таъйин шуданаш ба вазифа табрик гуфта, изҳори умед намуд, ки бо таъйин шудани ӯ ба ин вазифа муносибатҳои дуҷонибаи Ҷопон ва Тоҷикистон, ки аз аввали солҳои истиқлолияти давлати мо ба роҳ монда шудаанд, вусъати тоза пайдо хоҳанд кард.

Дар мулоқот тарафҳо вазъи ҳамкории дуҷонибаи иқтисодӣ-сармоягузории Ҷопону Тоҷикистон, инчунин нақшаҳои минбаъдаи рушди онҳоро баррасӣ ва муҳокима намуданд.

«Бо мақсади беҳтаргардонии фазои сармоягузориву соҳибкорӣ дар мамлакат Ҳукумати Тоҷикистон мунтазам ислоҳотҳои иқтисодиро татбиқ намуда истодааст. Айни ҳол дар ин самт як қатор санадҳои меъёрии ҳуқуқии нав қабул гардида, ба қонунгузории ҷорӣ як зумра тағйироту иловаҳо ворид шудаанд. Натиҷаи ин талошварзиҳо буд, ки Ҷумҳурии Тоҷикистон мувофиқи ҳисоботи ҳарсолаи Бонки умумиҷаҳонӣ «Doing Business» (Пешбурди Тиҷорат) ба рӯйхати даҳгонаи давлатҳои ислоҳотгар шомил гардид», - тазаккур дод Д. Саидов.

Вай афзуд, ки дар Тоҷикистон имконияту иқтидорҳои фаровон ва фазои муфид барои сармоягузорӣ мавҷуд аст. Аз ҷумла, Тоҷикистон дорои захираҳои бой дар соҳаҳои гидроэнергетика, маъданҳои кӯҳӣ, кишоварзӣ ва ғайра мебошад, ки ин барои сармоягузорон заминаи ҷолиб ва фоидаовари ба роҳ мондани фаъолияти сармоягузорӣ дар Тоҷикистонро фароҳам масозад.

Қайд гардид, ки айни замон дар қаламрави Ҷумҳурии тоҷикистон якчанд лоиҳаҳо дар соҳаҳои гуногуни хоҷагии халқ бо иштироки ҷониби Ҷопон татбиқ гардида истодаанд, ҳамчунин аввалин ширкати муштараки Тоҷикистону Ҷопон «Аввлвин» ба қайд гирифта шуд.

Йошихиса Курода зикр кард, ки баҳри баланд бардоштани сатҳи иттилоотонии соҳибкорони ҷопонӣ оид ба бозори Тоҷикистон чораҳои иловагӣ андешидан лозим аст. Инчунин, нақшаҳои худро дар бораи ҷалбу даъват намудани намояндагони бахши хусусии ҷопонӣ ба Тоҷикистон ҷиҳати муаррифии комил аз имкониятҳои иқтисодию сармоягузорӣ ва фазои солими он иброз намуд.