«Оид ба ворид намудани тағйиру иловаҳо ба Кодекси Ҷумҳурии Тоҷикистон «Дар бораи мурофиаи судии иқтисодӣ» аз масъалаҳое буданд, ки дар ҷаласаи Шӯрои Маҷлиси намояндагони Маҷлиси Олии Ҷумҳурии Тоҷикистон, ки таҳти раёсати Раиси Маҷлиси намояндагон баргузор гардид, баррасӣ шуданд.

Дар ҷаласа ҳамзамон, лоиҳаи Қонунҳои Ҷумҳурии Тоҷикистон «Оид ба ворид намудани илова ба Қонуни Ҷумҳурии Тоҷикистон «Дар бораи металлҳои қиматбаҳо ва сангҳои қиматбаҳо», «Дар бораи рӯзҳои ид», «Дар бораи Буҷети давлатии Ҷумҳурии Тоҷикистон барои соли 2011», «Оид ба ворид намудани тағйиру иловаҳо ба Қонуни Ҷумҳурии Тоҷикистон «Дар бораи бамеъёрдарории техникӣ», «Дар бораи фарҳанг» низ муҳокима гардиданд.
Раисони кумитаҳои Маҷлиси намояндагон Амир Катаев, Маҳмадалӣ Ватанов ва Марҳабо Ҷабборова ҳадаф аз пешниҳоди лоиҳаҳои қонунҳои мазкурро ба палатаи поёнии парлумони мамлакат тақозои замон арзёбӣ карданд. Зикр шуд, ки қабули лоиҳаҳои ин қонунҳо барои густариши соҳаҳои иқтисодиву иҷтимоӣ ва дар ин замина барои беҳбуди вазъи иҷтимоии аҳолии мамлакат муосидат менамоянд.