Вохӯрии раиси Маҷлиси намояндагони Маҷлиси Олии Ҷумҳурии Тоҷикистон Ш.Зуҳуров бо интихобкунандагон аз ҳавзаи интихоботии Рашт № 12 дар ноҳияи Тоҷикобод идома ёфт.
Рашт, 28 апрел. - Ш.Зуҳуров дар мулоқоти хеш бо интихобкунандагон дар ҳошияи Паёми Президенти Ҷумҳурии Тоҷикистон Эмомалӣ Раҳмон ибрози назар намуд. Вай зимни суханронӣ таъкид кард, ки Паёми имсолаи Сардори давлат аз паёмҳои пешин ба куллӣ фарқ дорад. Зеро Президенти мамлакат дар паёмаш пеш аз ҳама дастовардҳои миллату давлатро дар тӯли 20 соли Истиқлолият муқоиса намудааст.
Раиси Маҷлиси намояндагон ҳамчунин дар робита ба дастуру супоришҳои роҳбари давлат пиромуни масоили ободонии водии Рашт, вазъи сиёсӣ, кӯмакҳо ва дастгириҳои Ҳукумати Ҷумҳурии Тоҷикистон ба хотири рушду нумӯи навоҳии манотиқи кӯҳистони ҷумҳурӣ, ҷалби фарзандон ба мактабҳои олӣ, ривоҷи соҳаи кишоварзӣ ва ғайра ибрози назар намуд.
Баъд аз суханронии Шукурҷон Зуҳуров интихобкунандагон, аз ҷумла собиқадорони ҷангу меҳнат, фаъолон, омӯзгорон ва соҳибкорон дар суханронии хеш ба Ш.Зуҳуров арзи сипос намуда гуфтанд, ки тамоми мардуми водии Рашт аз сиёсати пешгирифтаи сардори давлат пуштибонӣ менамоянд ва Паёми имсолаи ӯро чун дастур интихоб карда, дар ободии минтақа ва ҷумҳурӣ саҳми босазои худро мегузоранд.
