Душанбе, 28 апрел. - Дар асоси нақша вакили Маҷлиси намояндагон бо сокинони ҷамоати деҳоти Лоҳутӣ, Шарифов, Ҳамробоев, Ортиқов, Пӯлодон, Патар ва толибилмону устодони чанд муассисаи таълимии Конибодом вохӯриҳо баргузор намуда, доир ба моҳияти асосии Паёми Президенти мамлакат Эмомалӣ Раҳмон ба Маҷлиси Олии Ҷумҳурии Тоҷикистон фикру андешаҳои худро баён дошт.

Таъкид шуд, ки Паёми имсолаи Сарвари давлат ба Маҷлиси Олӣ, ки ба соли таҷлили 20 – умин солгарди Истиқлолияти давлатии Ҷумҳурии Тоҷикистон рост омад, фоли нек буда, омили асосии рушд ва пешрафти тамоми соҳаҳои хоҷагии халқи мамлакат аст.

Вакили палатаи поёнии парлумони ҷумҳурӣ зимни вохӯриҳо аз Паёми Президенти мамлакат ба Маҷлиси Олӣ иқтибос оварда таъкид намуд, ки иҷрои ҳамаҷонибаи нуктаҳои Паём аз тарафи оддитарин шаҳрванди кишвар то мақоми олии роҳбарикунанда яке аз самтҳои асосии густариши соҳаҳои иқтисодӣ, иҷтимоӣ, фарҳангу варзиш ва дигар соҳаҳои ҳаётан муҳими ҷомеа ба шумор меравад.
Зимни саволу посухҳое, ки байни вакили Маҷлиси намояндагон ва интихобкунандагон сурат гирифт, бештар ба мавзӯъҳои баланд бардоштани мақоми зан дар ҷомеа, коҳиш додани сатҳи камбизоатӣ, таваҷҷӯҳ ба омӯзиши забонҳои давлативу хориҷӣ, мусоидат дар сохтмони пулҳо миёни Конибодом ва Ашт, таъмини амнияти озуқаворӣ, расидан ба истиқлолияти энергетикӣ, раҳоӣ аз бунбасти коммуникатсионӣ, масъалаҳои марбут ба фаъолияти соҳибкорӣ ва дигар мавзӯъҳои муҳими ҳаёти сокинони шаҳри Конибодом таваҷҷӯҳ зоҳир карда шуд.