Солҳои охир дар саросари ноҳияҳои кишоварзии мамлакат бунёди боғу токзори нав ва барқарорсозии боғҳои кӯҳна ҷараёни тоза гирифт.
Кӯлоб, 26 апрел. - Мувофиқи нақшаи дурнамои бунёди боғҳо мебояд дар 5 сол дар ҳамаи ноҳияҳо 1000 гектар боғи нав ва хусусан боғҳое, ки меваҳояшон содиротӣ мебошанд, бунёд гарданд. Ноҳияи Ховалинг, ки аслан ноҳияи кӯҳистон буда, талу теппаҳои зиёд дорад, имконияти васеи бунёди боғҳоро дорост.
Кишоварзони ноҳияи Ховалинг айни замон бо таъсис додани беш аз 1570 хоҷагии деҳқонию инфиродӣ бо заҳмати шабонарӯзӣ баҳри татбиқи барномаи давлатии таъмини озуқавории мамлакат саҳми муносиб мегузоранд. Боғдорони ноҳия то имрӯз дар майдони беш аз 400 гектар боғҳои нав бунёд кардаанд. Агар дар баъзе ҷамоатҳои деҳоти ноҳия вобаста ба фасли сол маъракаи ниҳолшинонӣ ба охир расидааст, дар ҷамоати деҳоти Шугнов, ки иқлими нисбатан сард дорад, деҳқонон то имрӯз ниҳолшинониро идома дода истодаанд ва то охири моҳи дигар низ дарахтони ба иқлим мутобиқро кӯчат менамоянд. Заҳматкашони яке аз хоҷагиҳои ҷамоати деҳоти Шугнов- хоҷагии деҳқонии «Сафар» имсол майдони боғҳои ҳудуди хоҷагиро ба маротиб васеъ намуда, ният доранд дар хоҷагӣ боғи сермева бунёд намоянд.
