Дар марҳилаи нахустини тақсими замин ба оилаҳои эҳтиёҷманд дар ноҳияи Бобоҷон Ғафуров 5 ҳазору 107 нафар соҳиби қитъаи наздиҳавлигӣ гардиданд.
Душанбе, 22 апрел. - Аз 6 ҳазору 499 аризаи воридшуда 1 ҳазору 392- тояш бо сабабҳои гуногун рад карда шуд. Инчунин ҳазор парванда барои марҳилаи дуюми тақсимоти замин омода буда, дар ҳолати тасдиқ гардидани иҷозатнома соҳибони он соҳиби замин мегарданд.
Мавриди зикр аст, ки соҳаи кишоварзӣ яке аз муҳимтарин соҳаҳои хоҷагии халқи ноҳия маҳсуб мешавад. Ҳаҷми умумии маҳсулоти кишоварзӣ дар давоми се моҳи аввали соли равон 21 ҳазору 520 ҳазор сомонӣ буда, бо мақсади рўёнидани ҳосили фаровон ҳамаи заминҳои киштшаванда сари вақт аз шудгори босифат бароварда, дар майдони 1 ҳазору 645 гектар боғ ва 2 ҳазору 516 гектар токзор корҳои таъмирӣ гузаронида шуданд.
