ки ба омӯзиши забони давлатӣ ва забонҳои хориҷӣ таваҷҷӯҳ зоҳир намуда, тамоми зинаҳои таҳсилотро бо маводи таълимӣ таъмин созанд.

Душанбе, 20 апрел. - Ӯ афзуд, ки «гарчанде соли 2010-ум Соли маориф ва фарҳанги техникиро бомуваффақият ҷамъбаст намудем, ин масъаларо набояд аз мадди назар дур созем. Баръакс, бояд ҳамасола барои рушди соҳаи маориф ва тафаккури техникии кӯдакону наврасон, омӯзиши илмҳои табииву риёзӣ, истифодаи технологияҳои иттилоотӣ ва коммуникатсионӣ тадбирҳои амалӣ андешем ва тавассути чорабиниҳои мухталиф ин иқдомро амалӣ гардонем».

Вақте сухан дар бораи таъмини ҳифзи иҷтимоии мардум, рушди соҳаҳои маорифу тандурустӣ, тавсеа ёфтани шабакаи технологияҳои иттилоотӣ, таблиғи тарзи ҳаёти солим, таҳсили ҷавонон ва ба воя расонидани мутахассисони ба талаботи замон ҷавобгӯ меравад, барои онҳо, пеш аз ҳама, муҳайё кардани шароити мусоид хеле муҳим аст.

«Бинобар ин рушди соҳаи маориф аз самтҳои афзалиятноки сиёсати иҷтимоии давлати мо эълон шудааст ва тақозои замон ин аст, ки сифати таълиму тарбия дар муассисаҳои таълимӣ бояд пайваста боло равад, ба талаботи таҳсил дар кишварҳои пешрафта ва бозори меҳнати ватаниву ҷаҳонӣ ҷавобгӯ бошад», зикр намуд Эмомалӣ Раҳмон.

Ҳамчунин барои ворид кардани технологияи нав, бахусус компютеркунонии муассисаҳои таълимӣ, беҳтар намудани сатҳу сифати таълим ва усулҳои муосири донишандӯзӣ ба Ҳукумат супориш дода шуд, ки то охири соли ҷорӣ Барномаи давлатии компютеркунонии мактабҳои таҳсилоти умумии кишвар пурра ба анҷом расад.

Таъкид гардид, ки дар ҳамаи зинаҳои таҳсилот ба омӯзиши забони давлатӣ таваҷҷӯҳи аввалиндараҷа зоҳир шуда, дар баробари ин донистани ду забон, бахусус забонҳои русӣ ва англисӣ шарт ва ҳатмӣ дониста шавад.

Ба Вазорати маориф Президенти мамлакат супориш дод, ки “Барномаи ислоҳот ва рушди муассисаҳои таҳсилоти ибтидоӣ ва миёнаи касбиро барои солҳои 2012-2020” таҳия карда, ба Ҳукумат пешниҳод намояд. Зеро таҳсилоти ибтидоии касбӣ яке аз зинаҳои муҳими соҳаи маорифи кишвар буда, иқтисоди миллиро бо мутахассисони соҳибкасб таъмин менамояд ва дар рушди ҳаёти иқтисодиву иҷтимоӣ ва фарҳангии мамлакат саҳми босазо мегузорад,- зикр намуд Э. Раҳмон.

Инчунин мақомоти дахлдори давлатӣ вазифадор шуданд, ки ба бозомӯзии наврасон, ҷавонон ва калонсолон таваҷҷӯҳ зоҳир намуда, дар заминаи муассисаҳои таҳсилоти ибтидоӣ, миёнаи касбӣ ва марказҳои таълимии калонсолон тибқи талаботи бозори меҳнат ва иқтисодиёти миллӣ курсҳои кӯтоҳмуддати омӯзиши касбҳои коргариро таъсис диҳанд.

Президент аз он изҳори хушнудӣ кард, ки солҳои охир вазъи муассисаҳои таҳсилоти олии касбӣ беҳтар гардида, заминаи моддиву техникии онҳо таҳким ёфта истодааст. Ин пешравӣ боис гардидааст, ки дар баробари шаҳрвандони дохилӣ таваҷҷӯҳи шаҳрвандони хориҷӣ низ ба муассисаҳои таълимии кишвар зиёдтар гардидааст.

«Имрӯз дар муассисаҳои таҳсилоти олии кишвар аз 28 мамлакати ҷаҳон қариб 3500 нафар донишҷӯёни хориҷӣ таҳсил менамоянд.

Дар баробари ин, роҳбарони муассисаҳои таҳсилоти миёна ва олии касбӣ вазифадоранд, ки пояи моддиву техникии муассисаҳои худро таҳким бахшида, ҷиҳати ба талаботи стандартҳои байналмилалӣ мутобиқ гардонидани озмоишгоҳҳо ва марказҳои илмиву татқиқотӣ чораҳои зарурӣ андешанд», таъкид намуд Э.Раҳмон.