Рӯзи мақомот дар Шугнов
20 апрел 2011 | Хонданд: 480 нафар | Ҷамъият
Бо мақсади сазовор истиқбол гирифтани 20-солагии Истиқлолияти давлатии Ҷумҳурии Тоҷикистон мақомоти иҷроияи ҳокимияти давлатии ноҳияи Ховалинг мутобиқи нақшаи таҳиянамудаи ҷашнӣ рӯзҳои мақомотро дар ҷамоатҳо доир менамояд.
Ховалинг, 20 апрел. - Дар робита ба ин чанде қабл дар ҷамоати деҳоти «Шугнов» рӯзи мақомот доир гардид ва дар ин рӯз дар доираи амалигардонии Қонуни Ҷумҳурии Тоҷикистон «Дар бораи танзими анъана ва ҷашну маросимҳо» хатнатӯйи якҷояи фарзандони сокинони ҷамоатро баргузор намуданд.
Соҳибкорони маҳаллӣ ва роҳбарони корхонаҳои саноатии ҳудуди ҷамоат бо дастгирӣ аз иқдоми пайваста ва хайрхоҳонаи сарвари давлат хатнатӯи 50 нафар кӯдакон ва тӯи арӯсии се ҷуфти ҷавонро гузарониданд. Дар чорабинии тантанавӣ роҳбарияти ҳокимияти маҳаллӣ ва дигар меҳмонон иштирок ва соҳибҷашнҳоро табрик намуда, ба онҳо тӯҳфа супориданд. Ҳунарнамоии санъаткорон шодию фараҳи мардумро дучанд намуд.
