Роштқалъа зодаи истиқлолият аст. Ноҳия дар 20 – соли истиқлолияти кишвар хеле рушд ёфт.
Хоруғ, 19 апрел. - Бо дастгирӣ ва кӯмаки ҳамаҷонибаи Ҳукумати Ҷумҳурӣ ва мақомоти маҳаллии ҳокимияти давлатии вилоят корҳои ободониву созандагӣ дар ин ноҳияи кӯҳистон тадриҷан вусъат меёбанд.
Дар солҳои истиқлолияти кишвар дар ноҳия беш аз 80 иншооти аҳамияти иҷтимоиву фарҳангӣ дошта бунёд гардида, рӯзгори мардум беҳбудӣ ёфт. Бо маблағгузории Ҳукумати Ҷумҳурӣ ва вилоят дар ноҳияи Роштқалъа 8 мактаби нав сохта шуда, 18 мактаб таъмир гардид. Бинои бонки амонатгузорӣ, варзишгоҳ, 11 пули мошингарду пиёдагард, 5 маркази саломатӣ, 4 сехи дӯзандагӣ, 2 истгоҳи хурди барқӣ ва даҳҳо иншооти дигар сохта шудаанд. Имсол дар ноҳия бунёди нерӯгоҳи обию барқӣ, ки иқтидораш беш аз 10 мегаватт аст, оғоз мегардад. Ин имконият медиҳад, ки дар ин ҷо корхонаҳои гуногун, аз ҷумла корхонаи коркарди маъданҳои кӯҳӣ бунёд ёбанд.
