«Ояндаи ҷомеа ба фарзандони солиму босавод, хушодобу дорои маърифати баланди инсонӣ вобастагӣ дорад, аз ин рӯ лоиҳаи қонуни мазкур дар мавриди ба камол расонидани фарзандони фарзона дар ҷомеаи Тоҷикистон нақши муассир мебозад».
Душанбе, 18 апрел. - Ин матлаб зимни баррасии лоиҳаи Қонуни Ҷумҳурии Тоҷикистон «Дар бораи масъулияти падару модар дар тарбияи фарзанд», ки 18 апрел дар ҷаласаи Шӯрои Маҷлиси намояндагон муҳокима шуд, зикр гардид.
Ба андешаи аъзои Шӯро қабули лоиҳаи қонуни мазкур масъулияти падару модарро дар тарбияи фарзандон баланд намуда, барои ояндаи онҳо заминаи мусоид фароҳам меорад.
Бояд тазаккур дод, ки лоиҳаи Қонуни Ҷумҳурии Тоҷикистон «Дар бораи масъулияти падару модар дар тарбияи фарзанд» баъди баррасии умумихалқӣ аз 14 декабри соли 2010 аз ҷониби Президенти мамлакат барои баррасӣ ба Маҷлиси намояндагон пешниҳод гардид.
Дар муҳокимаи лоиҳаи қонун, ки муддати дуюним моҳ идома ёфт, қариб 2 миллион нафар сокинони мамлакат иштирок намуда, беш аз 8500 таклиф пешниҳод гардид. Ҳангоми такмили лоиҳаи қонун беш аз 4000 таклиф ба инобат гирифта шуд.
