Душанбе, 15 апрел. - Дар кори конфронси байналмилалӣ оид ба ислоҳоти соҳаи кишоварзӣ аъзои Ҳукумати Ҷумҳурии Тоҷикистон, роҳбарияти як қатор вазорату идораҳои давлатӣ, мутахассисони соҳа аз шаҳру ноҳияҳои ҷумҳурӣ, намояндагони корпусҳои дипломатии муқими Тоҷикистон, институтҳои молиявӣ, донорҳо ва шарикони рушди Тоҷикистон иштирок доштанд.

Муродалӣ Алимардон- муовини Сарвазири Ҷумҳурии Тоҷикистон конфронси мазкурро ифтитоҳ намуд.

Сипас Президенти Ҷумҳурии Тоҷикистон Эмомалӣ Раҳмон суханронӣ намуда, муфассал дар бораи сиёсати кишоварзии Ҳукумати Ҷумҳурии Тоҷикистон, дастоварду пешравиҳои соҳа, имконияту камбудиҳо ва оид ба самтҳои стратегии пешрафти соҳаи кишоварзӣ таваққуф кард.

Аз ҷумла, ӯ зикр намуд, ки «соҳаи кишоварзӣ аз ҷумлаи соҳаҳои муҳими иқтисоди миллӣ буда, яке аз ҳадафҳои стратегии мо таъмини амнияти озуқавории мамлакат ва беҳдошти вазъи иқтисодии мардум аз дараҷаи рушди ин соҳа вобастагии амиқ дорад».

Ҳамчунин, тайи даҳ соли охир дар соҳаи кишоварзии мамлакат бо ҷалби маблағҳои институтҳои байналмилалии молиявӣ 16 лоиҳаи сармоягузорӣ ба маблағи умумии беш аз 1 миллиарду 300 миллион сомонӣ мавриди амал қарор дода шуд.

Дар натиҷаи тадбирҳои андешидашуда маҷмӯи маҳсулоти кишоварзии Тоҷикистон тадриҷан афзоиш ёфта, соли 2010 ҳаҷми умумии он 9,4 миллиард сомониро ташкил намуд, ки ин нишондиҳанда нисбат ба соли 2009-ум 7 фоиз зиёд мебошад,- афзуд ӯ.

Аз ҷумла, соли 2009 бори аввал дар таърихи Тоҷикистон истеҳсоли ғалладона ба 1 миллиону 300 ҳазор тонна расид, ки ин ба паст кардани шиддати болоравии нархи маводи асосии ғизоӣ мусоидат намуд.

Президенти мамлакат аз он изҳори нигаронӣ кард, ки яке аз мушкилоти рушди соҳаи кишоварзӣ дар ҷумҳурӣ норасоии техникаву технологияи муосир буда, дар ин ҷода зарурати рушди фаъолияти лизингӣ ба миён омадааст.

Бинобар ин вазоратҳои молия, адлия, кишоварзӣ, Кумитаи андоз ва Хадамоти гумруки назди Ҳукумати Ҷумҳурии Тоҷикистонро зарур аст, ки ҷиҳати фароҳам овардани заминаи меъёрию ҳуқуқии воридот ва истифодаи техника ва таҷҳизоти кишоварзӣ тавассути лизинг чораҳои муассири иловагӣ андешанд. Инчунин, бояд механизми фаъолияти лизингӣ (мӯҳлат, пешпардохти қисми арзиш, фоизҳои маблағ) бо дарназардошти фароҳам овардани сабукӣ ба кишоварзон такмил дода шавад,- тазаккур дод Эмомалӣ Раҳмон.

Дар конфронс, ҳамчунин Раиси Шӯрои ҳамоҳангсозии донорон Ҷоҷи Такеши, намояндаи доимии Бонки Осиёгии Рушд дар Ҷумҳурии Тоҷикистон сухан карда, ба роҳбарияти давлату ҲҶТ барои ҳамкорӣ ва мусоидати ҳамаҷониба дар кори онҳо изҳори сипос кард.

Кори конфронс идома дорад. Нимаи дуюми рӯз мутахассисон ба ба бахшҳо тақсим шуда, масъалаҳои ислоҳоти соҳаи об, ислоҳоти замин, ислоҳоти худидоракунии маҳаллӣ ва дигар масъалаҳои муҳими соҳаро баррасӣ менамоянд.