Душанбе, 13 апрел. -Ин хонаи истиқоматӣ асосан барои зиёиёни ҷавон ва хизматчиёни давлатӣ, ки ба шаҳри Хуҷанд барои кор меоянд, бунёд гардидааст, мегӯяд сардори Раёсати сохтмони асосии мақомоти иҷроияи ҳокимияти давлатии шаҳри Хуҷанд Неъматҷон Юсуфов.

Бинои мазкур аз хонаҳои се-чор ҳуҷрагӣ иборат буда, масоҳати ҳар яки он аз 98 то 108 метри мураббаъро ташкил медиҳад. Ҳуҷраҳо кушоду барҳаво буда, ба санъати меъмории муосир ҷавобгӯянд. Дар болои бино барои кӯдакони истиқоматкунандагон ба тариқи озмоишӣ боғча-яслӣ бунёд мегардад.

Кӯдакони бошандагони биноро мураббиёни ғамхору меҳрубон то расидан ба синни мактабӣ тарбия менамоянд. Ин бинои истиқоматӣ чорумин иншоот мебошад, ки аз аввали соли ҷорӣ ба пешвози ҷашни 20-умин солгарди Истиқлолияти ҶТ мавриди истифода қарор гирифтааст.

Айни замон дар чор силсилабинои истиқоматии шаҳри Хуҷанд, ки ҳар кадом аз 16 то 34 ҳуҷрагиро дар бар мегиранд, корҳои бунёдкорӣ бо сифати баланд ҷараён доранд.