Дар остонаи ҷашни Ваҳдати миллӣ, ки ҳамасола 27 июн таҷлил мегардад дар деҳаи Заркамари ҷамоати деҳоти Мисконободи ноҳияи Файзобод мактаби нави замонавӣ ба истифода дода мешавад.
Душанбе, 9 март. - Мактаби мазкур аз ҳисоби маблағгузории Бонкии исломии рушд ва саҳми Ҳукумати Ҷумҳурии Тоҷикистон барои 624 ҷойи нишаст сохта шуда, зимни сафари кории худ вазири маорифи ҷумҳурӣ Абдуҷаббор Раҳмонов аз ҷараёни корҳои сохтмонӣ шинос гардида, вобаста ба корҳои рангу боркунӣ ва ороиши синфхонаҳо ба масъулин дастуру супоришҳои мушаххас дод.
Назар ба иттилои сардори маркази матбуоти Вазорати маорифи ҷумҳурӣ Ноилшо Нуралиев мактаб бо тарҳи замонавӣ сохта шуда, аз бинои таълимӣ, маҷлисгоҳ, толори варзишӣ ва ошхона иборат аст. Инчунин, дорои синфхонаҳои таълимии фанҳои кимиё, математика, физика, биология, нақшакашӣ, ҷуғрофия ва таълими меҳнат бо ашёи зарурии лабараторию амалӣ ҷиҳозонида мешавад. Барои сохтмони ин муассисаи таълимӣ беш аз 2 миллион доллари америкоӣ ва барои муҷаҳҳаз гардониданаш 260 ҳазор доллар сарф гардидааст.
