Душанбе, 1 март. - Дар ин хусус қарори марбутаи Раиси шаҳр ба тасвиб расид, ки тибқи он аз ҳисоби маблағҳои озоди буҷети шаҳр ва фонди захиравии Раиси шаҳр беш аз 1 миллион сомонӣ ҷудо мегардад.

Ин иқдом дар партави анъанаҳои хайрхоҳона ва татбиқи амалии сиёсати Сарвари давлат оид ба дастгирии иҷтимоии табақаҳои ниёзманди ҷомеа андешида шуд. Тибқи ин иқдом ба 222 нафар иштирокчиёни Ҷанги Бузурги Ватании солҳои 1941-1945 ба андозаи 500 сомонӣ, ба 156 нафар шахсони бо ордену медалҳои ИҶШС барои меҳнати фидокорона ё хизмати бенуқсони ҳарбӣ дар ақибгоҳ дар солҳои ҶБВ сарфарозгардида 400 сомонӣ кӯмакпулӣ расонида мешавад. Инчунин, ба 451 нафар шахсоне, ки зиёда аз шаш моҳ дар ақибгоҳ кор кардаанд, ба 3 нафар дар муҳосираи шаҳри Ленинград буда, 115 нафар маъюбони амалиёти ҷангӣ дар қаламрави давлатҳои дигар (Афғонистон), 160 нафар маъюбони рафъи садамаи нерӯгоҳи барқӣ-атомии Чернобил, 246 нафар оилаи шахсоне, ки ҳангоми ҳимояи сохти конститутсионии Ҷумҳурии Тоҷикистон ҳалок гардидаанд, 7 нафар ҳамсарони ҷанговарони дар ҶБВ ҳалокгардида ва 769 нафар оилаҳои шаҳри Душанбе, ки дар онҳо аз ду нафар зиёд маъюб зиндагӣ мекунанд, ба ҳар кадом ба андозаи 350 сомонӣ кӯмакпулии яквақта дода мешавад.