Душанбе, 25 феврал. - Аз ин нуқтаи назар пешгӯӣ ва дидани чораҳо барои паст кардани таъсири ин офатҳо вазифаи асосии Вазорати кишоварзӣ ва сохторҳои дахлдор маҳсуб мешавад.

Санаи 24- уми феврали соли 2011 дар доираи барномаи Вазорати рушди иқтисод ва савдои Ҷумҳурии Тоҷикистон дар ҳамкорӣ бо Барномаи Рушди Созмони Миллали Муттаҳид дар бинои Маркази тадқиқоти стратегии назди Ҳукумати Ҷумҳурии Тоҷикистон вобаста ба низоми мониторинг (пешгӯи)-и офатҳои «Маркази огоҳкунии пешакӣ» семинар дар мавзӯи «Таҳияи ҳисоботи муштарак оид ба мониторинги хавфи офатҳои табиӣ, вазъи обу ҳаво ва сабабҳои пайдоиши малах дар Тоҷикистон» баргузор гардид. Дар кори семинар намояндагони гурӯҳҳои корӣ аз вазорат, ташкилоту созмонҳои давлатӣ ва ғайридавлатӣ оид ба татбиқи барномаи мазкур иштирок намуданд.

Ҳамзамон аз Вазорати кишоварзӣ аъзои гурӯҳи корӣ, мутахассиси шӯъбаи матбуот ва иттилоот Акрам Файзов ва сардори КВДX «Мубориза бар зидди малах» Қиёмиддин Ғаниев дар кори семинар ширкат намуда, оид ба сабабҳои пайдоиш, паҳншавӣ ва усулҳои мубориза бар зидди малах дар Тоҷикистон сухан гуфтанд. Ба иштирокчиёни семинар филми мустанад, ки дар мавзеъҳои аз малах зарардида наворбардорӣ шудааст, намоиш дода шуд.

Ёдовар мешавем, ки соли 2010-ум дар ҷумҳурӣ дар масоҳати 275 200 гектар мушоҳидаҳо гузаронида маълум намуданд, ки малах дар майдони 108 000 гектар тухм гузоштааст. Аз масоҳати 105080 гектар майдони паҳнгаштаи малахҳо дар 81724 гектар коркард гузаронида шуд ва бо гузаронидани ин амалиёт киштзор аз зараррасонҳои зироати кишоварзӣ эмин нигоҳ дошта шуд. Дар ин чорабинӣ 65- адад трактори дорупошии ОВХ-28, 1050 адад дорупошакҳои дастӣ ва 1150 нафар қувваи корӣ сафарбар гардид.

Дар машварат миёни мутахассисони вазорат ва иштирокдорон саволу ҷавоб доир гардид.