Душанбе, 25 феврал. - Дар мулоқот ваъзи кунунӣ ва дурнамои ҳамкориҳои Тоҷикистону Туркия дар соҳаҳои иқтисодиёт, тиҷорат, энергетика, кишоварзӣ, фарҳанг, туризм ва варзиш мавриди баррасӣ қарор гирифт.

Оқил Оқилов аз раванди бемайлони рушди муносибатҳои иқтисодию тиҷоратии ду давлат изҳори қаноатмандӣ карда таъкид намуд, ки агар соли 2009-ум гардиши савдои хориҷии Тоҷикистон бо Туркия 211 млн. долларро ташкил дода бошад, пас ин нишондиҳанда дар соли 2010-ум ду баробар афзун гардида, ба 435 млн. доллари амрикоӣ баробар шудааст. Таъкид гардид, ки ҷониби Тоҷикистон хостори бунёди корхонаҳои муштарак оид ба истеҳсоли таҷҳизоти электрикӣ ва коркарди маҳсулоти кишоварзӣ буда таъсиси марказҳои таълимиро барои омода кардани мутахассисони бахши туризм ва хизматрасонӣ муфид мешуморад.

Дар навбати худ сафири нави фавқулодда ва мухтори Ҷумҳурии Туркия дар Тоҷикистон Меҳмет Мунис Дирик таъкид кард, ки тамоми сайъу талошҳои худро дар Тоҷикистон барои ба сатҳи боз ҳам баландтар расонидани муносибатҳои гуногунҷабҳаи Тоҷикистону Туркия сарф намуда, ҷиҳати фаро гирифтани бахшҳои бештари ҳамкориҳои ду давлат бо истифода аз имконоту захираҳои истифоданашуда талош хоҳад кард.

Дар мулоқот, ҳамзамон масоили вобаста ба ҳамбастагии Тоҷикистону Туркия дар таъмини амнияту бехатарии минтақа, мубориза ба муқобили терроризму экстремизми байналмиллалӣ ва гардиши ғайриқонунии маводи мухаддир мавриди баррасӣ қарор дода шуд.