Суғд, 23 феврал. - Айни замон дар шаҳру ноҳияҳои Шаҳристон, Панҷакент, Бобоҷон Ғафуров, Исфара, Ашт тақсими қитъаҳои замини наздиҳавлигӣ муташаккилона ҷараён дорад.

Тақсими замин баъди муайян намудани эҳтиёҷмандон аз ҷониби комиссияҳои мақомоти давлатӣ ва ҷамоавӣ бо роҳи қуръапартоӣ амалӣ мешавад.

Дар ҳар як шаҳру ноҳия нақшаи иқтисодӣ- меъморӣ муайян гардида, аз ҳисоби заминҳои ҷудошуда бунёди инфрасохтори ҳар як маҳали нав, чун роҳу пулҳо, хатҳои интиқоли барқ, истгоҳҳои барқӣ, мактабу кӯдакистон, марказҳои хизматрасонӣ дар назар аст.

Ҷудо шудани қитъаҳои замини наздиҳавлигӣ дар баробари беҳдошти вазъи манзилӣ ба баланд шудани сатҳи зиндагии оилаҳо, хусусан оилаҳои ҷавон низ мусоидат менамояд.