Шермуҳаммад Шоҳиён раиси Комиссияи марказии интихобот ва раъйпурсии Ҷумҳурии Тоҷикистон интихоб гардид.

Душанбе, 23 феврал. - Шукурҷон Зуҳуров- Раиси Маҷлиси намояндагон Шермуҳаммад Шоҳиёнро ба муносибати ба ин вазифаи масъулиятнок интихоб гардиданаш сидқан табрик намуда, ба ӯ комёбиҳои беназир таманно намуд. Шукурҷон Зуҳуров гуфт, ки бояд Комиссияи марказии интихобот ва раъйпурсии ҷумҳурӣ бо парлумон, мақомоти марбута ва қишрҳои гуногуни ҷомеа робитаи зич ва қавӣ дошта бошад, ки ин метавонад ба рушди равандҳои демократӣ, эъмори ҷомеаи шаҳрвандӣ ва баргузории интихоботи озоду шаффоф мусоидат намояд.

Шукурҷон Зуҳуров дар маросими ботантана Шермуҳаммад Шоҳиёнро барои саҳми шоистааш дар фаъолияти палатаи поёнии парлумони мамлакат бо ифтихорномаи рақами 1-и Маҷлиси намояндагон сарфароз гардонид.

Инчунин, бо Қарорҳои Маҷлиси намояндагони Маҷлиси Олии Ҷумҳурии Тоҷикистон ваколати вакили МН МО ҶТ Шермуҳаммад Шоҳиён пеш аз мӯҳлат қатъ гардида, аз ҳайати Кумитаи МН МО ҶТ оид ба тартиботи ҳуқуқӣ, мудофиа ва амният бароварда шуд. Ҳамзамон, бо Қарорҳои палатаи поёнии парлумони мамлакат Шермуҳаммад Шоҳиён аз вазифаи раиси Кумитаи МН МО ҶТ оид ба тартиботи ҳуқуқӣ, мудофиа ва амният озод гардида, аз ҳайати Шӯрои МН МО ҶТ бароварда шуд.
Мавриди зикр аст, ки Шермуҳаммад Шоҳиён дар мақомоти гуногуни судию ҳуқуқии Тоҷикистон солҳои тӯлонӣ фаъолият кардааст. Аз ҷумла, солҳои 1994-1995 муовини вазири адлияи Ҷумҳурии Тоҷикистон таъин шуд ва сипас шаш сол мушовири давлатии Президенти Ҷумҳурии Тоҷикистон оид ба сиёсати ҳуқуқӣ-намояндаи комилҳуқуқи Президенти Ҷумҳурии Тоҷикистон дар Маҷлиси миллӣ ва Маҷлиси намояндагони Маҷлиси Олии Ҷумҳурии Тоҷикистон буд. Аз соли 2006 то 2010 дар вазифаи раиси Шӯрои адлияи Ҷумҳурии Тоҷикистон ифои вазифа намуд. Шермуҳаммад Шоҳиён узви ягон ҳизбӣ сиёсӣ намебошад. Мавсуф дар интихоботи парлумонии моҳи феврали соли 2010 аз ҳавзаи интихоботии Сино вакили Маҷлиси намояндагон интихоб гардида буд. Дар палатаи поёнии парлумони мамлакат раисии Кумита оид ба тартиботи ҳуқуқӣ, мудофиа ва амниятро ба ӯҳда дошт.