Душанбе, 21 феврал. - Ҳадафи сафари ҳайати мазкур табодули таҷриба бо ҳамтоёни тоҷикашон мебошад.

Сафари тарроҳони қирғиз дар чаҳорчӯби барномаи «Пешбурди тиҷорат дар Тоҷикистон», ки аз ҷониби Идораи давлатии Швейтсария дар умури иқтисод (СЕКО) маблағгузорӣ мешавад, сурат мегирад.

Назар ба иттилои Саидмӯъмин Камолов, роҳбари барномаи миллии лоиҳаи «Пешбурди тиҷорат дар Тоҷикистон» ва Маркази байнулмилалии тиҷорат, ҳадаф аз ин сафар муаррифии ширкатҳои хадамотрасони қирғиз ба корхонаҳои нассоҷӣ ва дӯзандагии Тоҷикистон, табодули таҷриба, барқарор кардани тамосҳои тиҷоратӣ ва ҳамкории эҳтимолӣ миёни корхонаҳои нассоҷӣ ва дӯзандагӣ, ширкатҳои хадамотрасон ва донишгоҳҳои ду кишвар мебошад. Барномаи расмии сафари ҳайати мазкур бо баргузории мизи мудаввар дар Вазорати энергетика ва саноати ҷумҳурӣ оғоз меёбад. Дар мизи мудаввар намояндагони ниҳодҳои марбутаи давлатӣ, корхонаҳои нассоҷиву дӯзандагӣ ва Маркази байнулмилалии тиҷорат иштирок менамоянд. Ҳамчунин, ҳайати қирғизистонӣ аз корхонаҳои нассоҷӣ ва дӯзандагии шаҳрҳои Душанбею Хуҷанд дидан карда, бо омӯзгорон ва донишҷӯёни Донишгоҳи технологии Тоҷикистон мулоқот мекунанд.

Дар назар аст, ки зимни вохӯрию сӯҳбатҳо мутахассисони қирғиз хадамот ва ҳунару малакаи худ, ҳамчунин, факултаҳои тарроҳии мӯд дар донишгоҳҳои Қирғизистонро муаррифӣ хоҳанд кард. Сафари ҳайати тарроҳони қирғизстонӣ ба Тоҷикистон то 24 феврал идома меёбад.

Барномаи «Пешбурди тиҷорат дар Тоҷикистон» тасмим гирифтааст то дар оянда чунин як сафари намояндагони корхонаҳои нассоҷӣ ва дӯзандагии Тоҷикистонро ба Қирғизистон ба хотири табодули таҷриба созмон диҳад.
Абдуфаттоҳ Шафиев мушовири миллӣ дар масоили тамос бо ҷомеаи лоиҳаи мазкур мегӯяд, ки ҳадафи умумии Барномаи «Пешбурди тиҷорат дар Тоҷикистон» дастгирӣ намудани рушди устувор ва гуногунсозии раванди содиротии корхонаҳои Тоҷикистон тавассути боло бурдани рақобатпазирии маҳсулоти саноати нассоҷӣ ва дӯзандагӣ дар кишвар ва беҳтар кардани зерсохтори идораи сифат мебошад. Ин тарҳ аз ҷониби Ҳукумати Швейтсария тавассути Идораи давлатии ин кишвар дар умури иқтисод (СЕКО) маблағгузорӣ мешавад.