Дар ВМКБ барқароркунии ҷангалзор идома дорад. Танҳо соли 2010 – ум 254 гектар ва аз солҳои 90 – ум то ҳозир 900 га майдони ҷангалзор аз нав барқарор гардид.
Хоруғ, 21 феврал. - Масоҳати умумии ҷангалзори вилоят ба 78 490 га расид.
Тавре сардори ҷангали вилоят Абдулназар Абдулназаров иттилоъ дод, ба хотири барқароркунии ҷангалҳои харобгардидаю бунёди ҷангалзори нав муассисаи онҳо дар баробари маблағгузории ҳукумат, инчунин, бо ташкилотҳои ғайридавлатӣ, аз ҷумла бо барномаи «Рушди ҳамкории Олмон» ҳамкорӣ дорад. Дар ҳамбастагӣ ба ин барнома лоиҳаи «Барқароркунии устувори ҷангалзори соҳилии Бадахшон» рӯи кор омад. Дар доираи ин барнома дар мавзеъҳои Инев, Птуп, Зимудг, Лангари ноҳияи Ишкошим ва Барвозу Занудҷи ноҳияи Роштқалъа ба хотири обёрии ҷангалзор ҷӯйборҳо бароварда шуданд. Ба амал баровардани ин барнома барои рушди ҷангалзори Бадахшон такони ҷиддӣ гардид.
Тадбири дигаре, ки баҳри барқарорсозии ҷангалзори вилоят андешида шуд, ин ба иҷора додани ҷангалзор мебошад, гуфт Абдулназар Абдулназаров. Ин тадбир имконият дод, ки ҷангалзори вилоят пурра ҳифз шаванд.
