Душанбе, 18 феврал. - Дар ин сафар Оқил Оқиловро раиси вилояти Суғд Қоҳир Расулзода, роҳбарони як қатор вазорату идораҳои ҷумҳуриявӣ ва вилоятӣ ҳамроҳӣ намуданд.
Сарвазири Ҷумҳурии Тоҷикистон Оқил Оқилов нахуст ба мавзеъи Моҳпарии шаҳри Исфара омада, бо фаъолияти пойгоҳи обкашии «Моҳпарӣ-1» шинос гардид. Тариқи фаъолияти ин пойгоҳи обкашӣ садҳо гектар замини санглохи ин мавзеъ ба боғу бӯстон табдил ёфтаву макони ҳазорҳо нафар мардум гаштааст. Имрӯзҳо бо супориши Президенти мамлакат корҳои азхудкунии дашти Моҳпарӣ идома ёфта, ҷиҳати кӯчонидани сокинони шаҳри Исфара, бахусус, сокинони ҷамоатҳои деҳоти Сурх, Чоркӯҳ, Ворух ба ин мавзеъ тадбирҳои амиқ амалӣ мегарданд.
Оқил Оқилов ба намояндагони вазоратҳои энергетика ва саноат, мелиоратсия ва захираҳои оби ҷумҳурӣ ҷиҳати бунёди зеристгоҳи барқии нав ва пойгоҳи обкашии «Моҳпарӣ-2» дастур дод.
Мавриди зикр аст, ки дар ҳолати амалӣ шудани ин нақшаҳои нек дар мавзеъи Моҳпарӣ боз майдони беш аз 1,5 ҳазор гектар замин азхуд шуда, мардуми зиёд соҳиби манзил ва ҷойи кор мегарданд.
Тибқи лоиҳаи пешниҳодгардида баҳри амалӣ намудани ин тадбир 3,6 миллион сомонӣ маблағ аз буҷети давлатӣ ҷудо мегардад.
Сарвазири мамлакат бо мутахассисони пойгоҳи обкашӣ мулоқоти самимӣ намуда зикр дошт, ки бо талошҳои пайвастаи Президенти Ҷумҳурии Тоҷикистон Эмомалӣ Раҳмон ҳадафҳои стратегии мамлакат, аз ҷумла таъмини истиқлолияти энергетикии кишвар амалӣ мегардад.
Имрӯзҳо сохтмони нерӯгоҳи барқи обии «Сангтӯда-2» босуръат идома дошта, дар сурати ба фаъолият шурӯъ намудани ин нерӯгоҳ таъмини аҳолӣ ва хоҷагии халқи ҷумҳурӣ бо нерӯи барқ беҳтар мегардад.
Зикр бояд кард, ки дар мавзеъи Моҳпарӣ шаҳраки Сомониён бунёд гаштаву соли 2010 аз буҷети вилоят дар ин мавзеъ мактаби замонавӣ барои 240 талаба сохта ба истифода дода шуд.

Сарвазири мамлакат Оқил Оқилов ба шаҳраки ангиштканон - Шӯроб омада, бо рӯзгори сокинони он, вазъи таъмин бо нерӯи барқ, оби нӯшокӣ, роҳҳо, ҳолати муассисаҳои маорифу тандурустӣ низ шинос гардид.
Мушкилоти асосии сокинони шаҳрак – нарасидани оби нӯшокӣ аст. Ба Шӯроб оби нӯшокӣ аз ҷамоати деҳоти Ворух, аз масофаи 32 километр тавассути қубурҳо интиқол дода мешавад. Ин иншоот соли 1969 бунёд гардида, ба азнавсозӣ эҳтиёҷ дорад. Дар ҳалли ин масъала Оқил Оқилов дар минтақаи обтақсимкунии шаҳрак ба масъулини вазорату идораҳои дахлдор супоришҳои мушаххас дод.
Ҳамчунин, Оқил Оқилов аз иншооти бунёдашон нотамоми қасри фарҳанг ва беморхонаи шаҳрак боздид намуд. Зикр бояд кард, ки сохтмони қасри фарҳанг ҳанӯз соли 1985 ва бинои чорошёнаи беморхонаи шаҳрак соли 1987 оғоз ёфта, 80 - 85 фоизи корҳои сохтмонӣ дар ин иншоот ба анҷом расидаанд. Аз ҷумла, дар бунёди қасри фарҳанги шаҳрак ба маблағи 48 миллион сомонӣ корҳои сохтмонӣ анҷом ёфтанд. Барои бо пуррагӣ ба истифода додани он беш аз 12 миллион сомонӣ зарур мебошад.
Сарвазири мамлакат изҳор дошт, ки тибқи барнома ва қарорҳои Ҳукумати Ҷумҳурии Тоҷикистон ин иншооти муҳим ба тавозуни вазоратҳои дахлдор вобаста шуда, давра ба давра бунёд гардида, дар пешрафти ҳаёти фарҳангии шаҳрак, солимию бардамии сокинони он мусоидат менамояд.
Мавриди зикр аст, ки дар шаҳраки Шӯроб алҳол 3 мактаби таҳсилоти ҳамагонӣ, 1 омӯзишгоҳи касбию - техникӣ амал менамояд. Сарвазири мамлакат ба мактаби таҳсилоти ҳамагонии рақами 11-и шаҳрак ташриф оварда, бо хонандагону муаллимон сӯҳбатҳои хотирмон намуд.
Инчунин, Сарвазири мамлакат аз беморхонаи марказии рақами 4-и шаҳрак дидан кард. Беморхонаи шаҳраки Шӯроб дорои 15 кат буда, дар он наздики 50 нафар табибону ҳамшираҳои шафқат фаъолият менамоянд.
Ба Сарвазири мамлакат сардухтури беморхона иттилоъ дод, ки табибон ҷиҳати беҳдошти солимии мардуми шаҳрак аз тамоми имкониятҳо истифода мебаранд. Чунончи, вазъи саломатии се нафар иштирокчии Ҷанги Бузурги Ватанӣ, ки муқими шаҳрак мебошанд, зери назорати доимии табибон қарор дорад ва барои муолиҷаи онҳо утоқи алоҳида ҷудо шудааст.
Дар маҷлисгоҳи корхонаи ҶШСК «Ангишт»-и шаҳрак бо иштироки Сарвазири Ҷумҳурии Тоҷикистон муаррифии Барномаи рушди шаҳраки Шӯроб баргузор гардид.
Дар ҷаласа раиси шаҳри Исфара Субҳониддин Ашӯров ба ҳозирин оид ба лоиҳаи Барномаи рушди шаҳрак маълумот дода зикр намуд, ки ин Барнома бо ташаббус ва дастгирии Президенти Чумҳурии Тоҷикистон Эмомалӣ Раҳмон амалӣ мегардад.
Сарвазири мамлакат Оқил Оқилов самтҳои асосии лоиҳаи Барномаро таҳлил намуда, ҷиҳати амалӣ намудани он ба масъулини вазорату идораҳо дастуру супоришҳо дод.
Ёдовар мешавем, ки ҷиҳати қабули лоиҳаи Барномаи рушди шаҳраки Шӯроб аз ҷониби Ҳукумати Ҷумҳурии Тоҷикистон аллакай аз моҳи апрели соли равон корҳои ободонӣ, таъминот бо барқ, оби нӯшокӣ, таъмиру тармими иншоот ва роҳҳо оғоз мегарданд. Тибқи лоиҳа ба амалӣ шудани Барномаи мазкур аз буҷети давлатӣ беш аз 90 миллион сомонӣ маблағ ҷудо хоҳад гашт, ки ба беҳдошти соҳаҳои иҷтимоӣ, иқтисодии шаҳрак равона хоҳад шуд.
Ин тадбир имкон хоҳад дод, ки дар шаҳрак беш аз 10 ҳазор мардум маскун гардида, ба ҷойҳои кории доимӣ низ таъмин шаванд. Дар баробари ин, ҳазорҳо гектар заминҳо обёрӣ гардида, бунёди боғҳо ва кишти зироатҳо ба роҳ монда мешаванд.
Сарвазири Ҷумҳурии Тоҷикистон Оқил Оқилов дар идомаи сафараш ба вилояти Суғд имрӯз ҳамчунин ба шаҳри Чкалов ташриф оварда, бо фаъолияти КВД «Востокредмет» шинос гардид.
Дар шаҳри Қайроққум Оқил Оқилов ва ҳайъати ҳамроҳонаш аз рафти сохтмони корхонаи истеҳсоли шиша ва зарфҳои шишагӣ дидан намуданд. Сохтмони иншооти мазкур аз ҷониби бинокорони маҳаллӣ анҷом мепазирад. Дар сурати мавриди баҳрабардорӣ қарор гирифтани корхонаи нави шишабарорӣ 120 нафар сокинон бо ҷои корӣ таъмин хоҳанд шуд.
Аз ҳама муҳимаш дар истеҳсоли маҳсулот баробари истифодаи ашёи хоми маҳаллӣ - реги квартсӣ аз партовҳои шишагӣ ба роҳ монда мешавад.
Аз хадамоти матбуоти раиси вилояти Суғд ба АМИТ «Ховар» иттилоъ доданд, ки дар поени сафар Оқил Оқилов аз ҷараёни бунёди иншооти ҷашнии шаҳри Хуҷанд боздид ба амал овард.