Аз нашр шудани нахустин шумораи ҳафтаномаи ҳуқуқӣ, сиёсӣ ва иҷтимоии «Қонун ва ҷомеа»-и Вазорати корҳои дохилии Ҷумҳурии Тоҷикистон се сол пур мешавад.
Душанбе, 3 феврал. - То имрӯз 155 шумораи он ба дасти хонандагон расид.
Тавре ба АМИТ «Ховар» котиби масъули ҳафтанома Умед Очилов иттилоъ дод, матолиби дар ҳафтанома чопшуда фарогири мавзӯъҳои ҳуқуқӣ, сиёсӣ, таърихӣ ва фарҳангиву варзишӣ буда, дар саҳифаҳои он доир ба ҷасорату фидокориҳои кормандону хизматчиёни мақомоти корҳои дохилӣ дар мубориза бар зидди ҷинояткорон ва аъзои дастаҳои ҷиноятпешаи ғайриқонунӣ, саҳми кормандони милиса дар ҳифзи тартиботи ҷамъиятӣ ва осудагии Ватани азиз маводи хонданбоб чоп мешаванд.
Нашри аввалин шумораи ҳафтанома ба 6 феврал - Рӯзи таъсисёбии милисаи Тоҷикистон рост омад. Ба чунин муддати кӯтоҳ нигоҳ накарда, сафи хонандагони ҳафтанома аз ҳисоби кормандону хизматчиёни мақомоти ҳифзи ҳуқуқ ва сохторҳои қудратии мамлакат, ҳуқуқшиносон, кормандони соҳаҳои адлия, суду прокуратура, мактабу маориф ва намояндагони дин афзуда, мақолаҳои онҳо пайваста дар ҳафтанома чоп мешаванд.
Сардабири ҳафтаномаи «Қонун ва ҷомеа», полковники милиса Ислом Нозимов, муовини сардабир, шоир ва рӯзноманигор Иззатбек Идизод буда, адибону рӯзноманигорон - Нурмуҳаммад Исҳоқӣ, Сироҷиддин Қосимов, Ховари Абулҳай ва Абдулло Шоев ҳайати эҷодиву таҳририи онро ташкил медиҳанд.
Ҳайати эҷодии ҳафтанома имрӯз барои ба чоп омада намудани шумораи навбатӣ, ки дар арафаи Рӯзи милисаи тоҷик ба дасти хонандагонаш мерасад, ҷаҳду талош доранд.
