Баррасии лоиҳаи Қонун «Дар бораи масъулияти падару модар дар тарбияи фарзанд» дар тамоми муассисаю корхонаҳои кишвар муташаккилона идома дорад.
Душанбе, 24 январ. - Аз ҷумла, чанде пеш дар бозори «Деҳқон» воқеъ дар маҳаллаи Гипроземи пойтахт миёни тоҷирони бозори мазкур баррасии лоиҳаи қарори мазкур сурат гирифт ва ҷамъомадагон пешниҳоду иловаҳои худро роҷеъ ба он баён намуданд.
Бино ба гуфти Обид Муҳаммадсиддиқов, як нафар тоҷири ин бозор, ӯҳдадориҳои падару модар дар таълиму тарбияи фарзанд дар лоиҳаи Қонуни мазкур зиёд зикр шудааст, аммо вазифаи фарзандон барои нигоҳубини волидайн кам ба назар мерасад. Ӯ пешниҳод намуд, ки бояд дар лоиҳаи Қонуни мазкур илова шавад, ки фарзандон вазифадоранд дар айёми пиронсолӣ волидайнашонро нигоҳубин намоянд.
Тоҷири дигари ин бозор Ибод Саидов илова намуд, ки масъалаи демографӣ ё танзими тавлид ба Қонуни мазкур илова шавад.
