Душанбе, 7 январ. - Дар моҳи декабр кӯчонидани аҳолии деҳаи Даҳаначӣ ба хонаҳои навбунёд, ки бар асари ҳодисаҳои табиии соли 2010 хисороти зиёд дида буданд, дар асоси суннатҳои мардумӣ сурат гирифт.

Боиси ёдоварист, ки соли сипаришуда дар натиҷаи селу обхезӣ ноҳияҳои Восеъ, Мӯъминобод, Ховалинг, Темурмалик, Балҷувон ва маҳаллаҳои Чармгарони Поён, Суғдиён, Нонвои Поён ва Кӯҳнашаҳри шаҳри Кӯлоб зарари калон диданд, ки дар натиҷа беш аз 800 оила бесарпаноҳ монд.

Бино ба иттилои Кумитаи ҳолатҳои фавқулодда ва мудофиаи гражданӣ дар минтақаи Кӯлоб то моҳи январи соли ҷорӣ 83 хона дар ноҳияи Восеъ, 10 хона дар ноҳияи Мӯъминобод, 13 хона дар ноҳияи Шӯрообод, 3 хона дар Ховалинг, 4 хона дар ноҳияи Темурмалик, 8 – то дар Балҷувон ба истифода дода шуд.

Қобили зикр аст, ки аз 616 хонаи дар 6 қитъа замини барои сохтмон ҷудо гардидаи шаҳри Кӯлоб то ин муддат 608 хона сохта шудааст. Дар хонаҳои боқимонда баъди қабули комиссияи давлатӣ бӯрёкӯбон гузаронида мешавад.